投資公司CFO型到爆 姚焯菲「富爸爸」曝光！

無綫節目《聲夢傳奇》捧紅一堆後起之秀，當中就以炎明熹、姚焯菲及鍾柔美3位小妹妹跑出，而近日風頭最勁嘅14歲巨肺姚焯菲（Chantel）除咗實力過人，佢觀眾緣又好，翻唱陳百強歌曲《戀愛預告》嘅片段依家已經去到逾305萬點擊。而一向都大方認係富家女嘅佢，佢嘅富爸爸都一樣被起底。

Chantel爸爸姚輝文，本身就擁有紐卡斯爾大學文學士學位同威爾士大學（卡迪夫商學院）工商管理碩士學位，依家就擔任投資公司嘅首席財務官（CFO）及常務董事。同時佢又係美國註冊會計師，於行內享負盛名！咁都未算，53歲嘅姚爸爸仲保養得非常好，同囡囡合照時似足「哥哥」，中佬都依然有型有款，唔怪得之可以供到愛女家住千呎星級豪宅。

另外，鍾柔美（Yumi）節目中同衛蘭合唱《就算世界無童話》，獲得大批觀眾好評，佢兩個關係都似足姐妹！早前衛蘭就索性親自接Yumi放學再送埋返屋企，兩個喺車把握時間練習之餘，又喺Yumi屋企翻睇佢嘅舊相同唔同獎項，兩個人仲話同對方相似添。