抗疫的日子 香港人現時自己肯做飯

同做網絡數據嘅朋友吹水(有帶口罩),佢嘅工作會見到唔少網絡大數據,即係搜尋啲乜、咩文章多人睇、咩片多人睇等等,從中約略知道香港人關注緊啲咩。   佢話呢期除咗多人search口罩、洗手呢啲疫情關鍵字之外,仲有幾個好反常嘅觀察。   首先,以往keep住多人搵、同去旅行相關嘅字眼,例如「機票」、「台北」、「東京」等等,一概變成冷門。梗係啦,當你臨出發都未知其他地方會唔會突然改政策封關,又或者有大爆發隨時變成要留喺酒店自我隔離,就倒不如唔飛好過。   至於估唔到多人搵嘅係……食譜。香港人向來鍾意出街食,而家連外賣都費事,最好就自己煮。不過識食唔代表識煮,買完餸都要搵師傅教路,上網搵食譜一啲都唔出奇。朋友都話,呢期女友煮足一日三餐,味道(佢一定要話有)進步之餘,最緊要係熟手咗,唔再搞到廚房戰場咁。   我就覺得,多人搵食譜,係因為時間多,留喺屋企煲《愛的迫降》2日都收工啦,倒不如玩吓煮飯仔,反正要食。   仲有一樣多人search嘅係親子遊戲。由過年放假計起,班細路已經冇返學個幾月,亦都仲有個幾月冇學返。出街驚傳染行山仲多人,留喺屋企又唔想細路淨係睇電視,家長唯有日日都要搞商場event咁,俾啲活動仔女玩(亦即係俾啲仔女玩)。   就咁睇,香港人嘅生活,咪就係變返「煮飯湊仔睇電視」呢種「愛回家」mode囉!唔好咩?你有幾耐未試過咁樣長時間對住屋企人先?