披荊斬棘的哥哥｜「古惑仔」過半成員加盟做哥哥 網民揶揄：仲叫哥哥？

內地綜藝節目《乘風破浪的姐姐》喺嚿年播出後引起極大迴響，製作組決定乘勝追擊，製作男星版本《披荊斬棘的哥哥》，並於今日（12日）首播。早前就正式公佈33位來自中港台「哥哥」名單。內地方面包括張晉、趙文卓、鋼琴家李雲迪等；台灣方面則邀請到前F4成員言承旭、前棒棒堂成員敖犬、情歌王子林志炫等；至於香港男星方面，則請到括張智霖、梁漢文、黃貫中、歐陽靖（MC Jin）以及3位「古惑仔」陳小春、謝天華和林曉峰。

唔少內地網民都對33位「哥哥」名單大感期待，對於搵嚟咁多港星，認為陣容非常鼎盛；不過，一班香港網民就喺討論區就有份參與嘅「哥哥」作出討論，認為佢哋已有一定年紀，應該叫叔叔先啱：「成班呀叔，仲叫哥哥」、「後生個批真係識你老鼠」、「成堆過晒氣」、「完全唔明係香港已經老土過晒時無人講，但係大陸一直都仲有熱度」等等；仲話好彩無鄭伊健份。

另外，亦有網民話估唔到黃貫中都有份參與節目，仲提到佢同另一名「哥哥」前棒棒堂成員敖犬嘅積怨，當年黃貫中公開批評棒棒堂咪嘴演出，同時又對外指：「棒棒堂3年後仲喺度先同我講」；對此事，網民就表示期待睇佢哋兩個正面交鋒，紛紛留言：「三年後事件終於有下文」、「過左十年大家同隊跳舞唱中國歌」等等，又指宜家係咪輪到敖犬同返黃貫中講：「你到個節目完都仲喺度先同我講嘢啦。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！