披荊斬棘2｜張智霖為贏比賽與老婆袁詠儀台上補辦婚禮 疑被蘇有朋暗寸借節目賣溫情

內地綜藝節目《披荊斬棘2》搵嚟多位中港台男星參賽，而香港代表就有林峯、吳卓羲、周柏豪、溫兆倫、杜德偉、劉愷威、曾比特、第一季嘅陳小春及張智霖，卡士相當強勁。節目自播出以嚟話題不斷，連帶參賽者們亦人氣急升。日前節目已經去到第三次公演，張智霖為咗贏比賽，竟然出動必殺技，就係邀請老婆袁詠儀參與，喺表演台上補辦婚禮，場面既溫馨又感人。節目出街後，疑似令「哥哥」蘇有朋有微言，暗寸張智霖借節目賣溫情。

喺第三次公演中，張智霖與內地演員范世錡、張雲龍及泰國演員Mike Angelo合唱《無與倫比的美麗》，期間出動必殺技，邀請老婆袁詠儀喺表演台上補辦婚禮。張智霖與隊友們穿上白色禮服獻唱，張智霖更講到喺2011年嘅演唱會曾經向老婆承諾60歲補拍婚紗照，佢再話點解仲要等，佢就想喺今日俾佢一個提早10年嘅婚禮，並好sweet咁話：「袁詠儀，你就是我心目中的無與倫比的美麗」。之後張智霖就與著起婚紗嘅袁詠儀喺台上補辦婚禮，為佢戴上戒指，場面既溫馨又感人。

張智霖呢個必殺技一出，真係殺其他「哥哥」一個措手不及，睇到佢哋目瞪口呆。喺節目出街後「哥哥」金瀚宣傳新劇，「哥哥」蘇有朋見到對方留言表示如果有朋友一定會匯報，之後佢就回覆話：「也找個節目辦婚禮！」，疑似暗寸張智霖借節目賣溫情。

除咗疑似引起蘇有朋有微言之外，唔少網民亦認為張智霖呢個行為對其他「哥哥」唔公平同賣溫情，例如「技場上整出私人感情，公平麼？」、「競技比賽上搞私人感情，無話可說」、「這也太不公平了吧 也可惜了隊友做陪襯 有意見也不敢說啊 唉 建議有老婆帶上 没有的就帶好朋友 組合上來吧」、「勝之不武」、「真的很無語」、「不喜歡，結婚就結婚，每個綜藝都來一遍，見證人呢？膩了。」、「不欣賞，敗好感」、「這麼假還感動，感情氾濫嗎？從頭到尾的尷尬」及「真是為了錢什麼都敢演，只要你不尷尬，尷尬就是別人」等等

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！