拍《愛.回家》受委屈 「細龍太」陳思圻遭大前輩爆粗喪鬧

陳思圻拍劇捱鬧,真係慘慘豬!
陳思圻拍劇捱鬧,真係慘慘豬!

藝人陳思圻(前名陳偉琪)演「細龍太」深入民心,早已離巢的她大爆當年在劇組被一位「大前輩」及導演爆粗喪鬧,網民即猜測「大前輩」的身份。她又大爆遇過飛擒大咬的知名電影製作人,出價兩萬元月薪包她做「女朋友」!

在無綫處境劇《愛.回家之開心速遞》演「細龍太」而為人認識的陳思圻,在林柏希主持的節目中,表示離開無綫兩年仍願意一世做「細龍太」:「係我演活咗呢個角色,我驕傲㗎!唔係個個都做到㗎嘛!」她表示不排除為觀眾而回巢:「因為好多觀眾到依家仲等緊我返去,亦要多謝編劇錫住我,當日照住我性格去寫個角色。」但就大爆在劇組曾遭大前輩及導演爆粗大鬧,令她感到委屈。

呂慧儀成嫌疑人物?

思圻指「大前輩」並非真心想教她做戲,她說:「我覺得佢係想騷畀大家睇自己係number one,我睇緊啲位,諗緊點做,佢已經開始X交叉你,『你識唔識做戲㗎!』、『乜乜呀!』」連導演都鬧埋她一份,她表示:「我拎住手機睇緊個劇本,或者我場戲根本係咁,佢就嗌停:『X交叉做咩事呀你,做乜玩電話!』好多呢啲事會發生!」她口中的「大前輩」,有指劇中飾演惡死「熊尚善」的滕麗名成為嫌疑人物,陳思圻即否認:「唔係!真係要澄清,佢對我好好,好nice,一定唔係佢!」至於問到是否呂慧儀,思圻則表示:「逐個問梗係唔得啦,唔答喇!」

拒收錢做製作人女友

節目中,她又大爆有個知名電影製作人,聲稱有意簽她做藝人,但心懷不軌:「佢話我收入唔穩定,不如跟佢出trip做佢女朋友,每月畀兩萬蚊,跟住就行過嚟想咀我,我嚇到傻咗,擸袋即刻跑出去!」亦試過有人出價80至100萬邀她做活動司儀,卻古怪地問她會穿甚麼服裝,表示要招呼好多個老闆,她當然未有理睬,即使對方開價3,000萬一晚,她亦拒絕:「因為個遺憾係一世!」

陳思圻在林柏希的節目中,大爆鮮為人知的事。
陳思圻在林柏希的節目中,大爆鮮為人知的事。