拍MV乘機想咀林明禎 193自肥失敗

·1 分鐘文章
肥仔當193個大髀係枕頭咁瞓,真係夠晒老友!
肥仔當193個大髀係枕頭咁瞓,真係夠晒老友!

男子組合ERROR其中兩位成員193和肥仔昨日齊為本周五推出的新歌及MV宣傳,他們表示:「其實兩首歌想喺去年推出,不過既然爭唔到獎,喺我哋32歲生日推出仲有意義。」193又謂生日推出新歌依然有阻滯,因跟同公司的女團出道撞期,結果師妹要讓路:「我哋係大師兄,女團提早兩日出道。」

肥仔的新歌名叫《Dear MA MA》,他說:「姜濤首『我最喜愛的歌曲』叫《Dear My Friend,》,上網Search時,一打個『Dear』字,一定出埋我首新歌,係咪好醒呢?同埋希望韓國MAMA都睇到我,Anson Lo都可以進軍韓國市場,自己係跳唱歌手都會有機會。」193又謂碌人情卡及課金才請得「馬國女神」林明禎擔任新歌《再次Puppy Love》MV女主角,可惜自肥失敗:「因為返我母校拍攝,校長話校園唔鼓吹談戀愛,男女唔可以有身體接觸,原本想加咀戲,依家變咗頭貼頭、掂吓手。」