拖劉心悠錫住跑 嚮往崩潰爆喊 吳卓羲認變態

藝人劉心悠與吳卓羲（Ron）在新片中與小演員有不少戲份，最難忘鬧市狂奔一幕，Ron笑言要感謝心悠，因心悠有腳傷，他才有藉口放慢跑！

劉心悠與Ron早前受訪時重演拖手一幕，事實上拍攝電影《女人街，再見了》時，這下拖手完全不甜蜜，因他們沒感情線，拍攝期間更體力透支，演搬運工人的心悠用唧機搬貨卸貨，考驗體力！

Ron與兩位小演員最多戲份，最難忘來回喪跑樓梯，他說：「抱住一個都幾重，又拖住心悠跑，但我要多謝心悠，因為佢整親跛吓跛吓，我先唔使跑咁快。我同導演講，心悠唔可以跑咁快，整親女演員之後點拍？」他又自誇與小演員毫無代溝：「我哋做咗朋友，小朋友好早熟，拍完佢去咗美國讀書，用通訊軟件約我遲啲食飯添！」他笑言以往不太受小朋友歡迎，其姨甥女因少見，每次見他都喊，他得戚地說：「依家就攬住我！」心悠則自認不善應付小朋友，但教導家中的小鸚鵡，令她有做「媽咪」的感覺，出街會掛念牠。

挑戰做木匠

該片是廖啟智遺作，戲中智叔與小朋友的戲份最沉重，Ron原來很嚮往演沉重崩潰戲：「我有少少變態，可能平日唔鍾意喊，鍾意喺戲裏面喊！」心悠則想演跳舞或殘障角色，視為發洩。疫情前後，心悠想法有變，認為想做就去做，最近更挑戰做木匠：「我夢想做大件傢俬，之前整咗個手推洗手盆，依家整緊手推工具櫃，希望用2個月完成。」而Ron想多陪媽咪及爭取時間休息。此外，他透露其北京Figure博物館有其他人打理，現打算開威士忌酒吧，會在店內展出其收藏。