【捱出頭】《那些我愛過的人》下周首播 馬貫東上位做男二

·2 分鐘文章
《那些我愛過的人》劇照
《那些我愛過的人》劇照

無綫劇集《那些我愛過的人》將緊接《降魔的2.0》於下星期一(8日)出街,劇集選角十分有新鮮感,由黃翠如及「亞視CEO」林文龍擔正,仲搵咗馬貫東(Mark)及連詩雅(Shiga)做男二及女二,今次係馬貫東入行十幾年嚟首次擔任男二。

現年33歲嘅馬貫東,07年參加藝員訓練班後入行,同期有張頴康及樂瞳等等。多年嚟,佢都係喺劇集做一啲唔起眼嘅角色,例如侍應、記者及街坊等等,雖然係認得佢個樣,但相信唔係太多人記得佢個名。直至2016年佢終於有機會擔演要角,喺《鐵馬戰車》中飾演警長「揚明」,憑演出生動自然令觀眾留下深刻印象。後來更有機會加入處境劇《愛•回家之八時入席》,佢喺劇中飾演「十仔」唐中書,係古曉臣(黎耀祥飾)嘅愛徒,戇直乖乖仔形象深入民心,更憑角色獲提名《TVB 馬來西亞星光薈萃頒獎典禮2016》「最喜愛 TVB 飛躍進步男藝員」及《萬千星輝頒獎典禮2016》「飛躍進步男藝員」。

《鐵馬戰車》截圖
《鐵馬戰車》截圖

如果要講佢最深刻嘅角色,相信唔少觀眾會答係《愛•回家之開心速遞》嘅「暖男」秦博思(博士),博士起初心繫熊若水(呂慧儀飾),不過Mandy(謝芷倫飾)並冇放棄,最終打動男方,後來博士仲話希望同Mandy正式開始拍拖。唔少觀眾好鍾意睇呢對「博香CP」,之後馬貫東更憑角色獲提名《萬千星輝頒獎典禮2017》嘅「最佳男配角」,不過好可惜佢哋已經離開劇組。

謝芷倫 & 馬貫東
謝芷倫 & 馬貫東

之後,馬貫東喺《金宵大廈》單元《洞》飾演偷窺狂李家俊,經常透過牆上嘅洞去偷窺住隔壁嘅Mia(歐陽巧瑩飾),日日都要偷睇,唔睇唔安樂,完全俾到人一種變態嘅感覺。馬貫東嘅可塑性都幾大,做乖仔又得,變態偷窺狂都難佢唔到。

《金宵大廈》劇照
《金宵大廈》劇照

而今次馬貫東喺新劇《那些我愛過的人》飾演一位患自閉症譜系障礙嘅醫生「古希晨」,將會同Shiga飾演嘅方書文有感情線。有興趣睇馬貫東演出嘅朋友,到時記得準時收睇啦!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能