推介豐富茶漬飯定食+手工柚子卷蛋 母女檔主理西營盤新日系Cafe

·3 分鐘文章
推介豐富茶漬飯定食+手工柚子卷蛋 母女檔主理西營盤新日系Cafe
推介豐富茶漬飯定食+手工柚子卷蛋 母女檔主理西營盤新日系Cafe

香港嘅Cafe越開越多唔同種類,西營盤呢間新店就可以話係療癒風:簡約溫馨嘅木系裝修,可以放鬆嘅榻榻米坐位,家庭式食堂Feel嘅定食,手工製作嘅甜點等等。Cafe仲係寵物友善,有Dog’s Menu畀毛孩們開餐。

日常位於西營盤第二街,由兩母女主理,希望喺而家氣氛低沉嘅社會當中,提醒大家日常其實可以回歸簡單,因此選擇喺西營盤呢個有人情味嘅舊區開店。Lunch Time主打日式定食,另有多款甜點同飲品選擇,店主都透露希望之後可以推出素食Menu!

日常
日常

試業期間約兩三個禮拜就會轉一次定食款式,當中以呢個茶漬飯定食較受歡迎,有沙律、免治雞肉軟骨串、日本鯖魚、茶漬飯。沙律簡單以胡麻醬提味,清爽醒胃。免治雞肉軟骨串調味得宜,雞肉混入一粒粒軟骨增加咬口。

免治雞肉軟骨串配茶漬飯定食($138)
免治雞肉軟骨串配茶漬飯定食($138)

茶漬飯嘅湯係店主用玄米茶加自家高湯調配而成,入口以鰹魚乾嘅鮮味為主,後韻係茶嘅清香。飽滿彈牙嘅珍珠米飯上面加咗明太子醬,微微辛辣可以帶起湯底香味。煎日本鯖魚肉質嫩滑,食落魚油香味突出,完全唔腥,食到一半可以按喜好點蛋黃醬或者加檸檬汁換個口味。提提大家鯖魚比較多骨,不過都係大嘅斜骨,小心挑走就無問題啦。

柚子芝士卷蛋($50)
柚子芝士卷蛋($50)

自家烘焙嘅卷蛋每日會有兩至三款口味選擇,採訪當日就有焙茶卷蛋($48)同柚子芝士卷蛋。柚子芝士口味用咗Cream Cheese混合柚子果醬製作酸酸甜甜嘅忌廉內餡,外層嘅蛋糕亦有加入柚子皮提升香氣,最後加上忌廉、橙乾同柚子皮裝飾。忌廉嘅柚子味最明顯,蛋糕香味較淡但勝在口感濕潤鬆軟,整體味道清新、甜而不膩。

牛角窩夫配抹茶麻糬及豆腐雪糕($52)
牛角窩夫配抹茶麻糬及豆腐雪糕($52)

近年大熱嘅牛角窩夫通常都係配雜莓或者雲呢拿雪糕,呢度嘅店主想配合返Cafe嘅日系風格,就選擇搭自家製抹茶麻糬。牛角窩夫口感酥脆唔過硬,配煙韌嘅麻糬估唔到又幾夾,麻糬仲灑上日本抹茶粉,同有黃豆香嘅豆腐雪糕加埋一齊的確幾有日式風格。

柚子氣泡咖啡($48)
柚子氣泡咖啡($48)
柚子氣泡咖啡($48)
柚子氣泡咖啡($48)

特飲亦有水準,咖啡選用偏堅果風味嘅意大利豆,味道香醇唔太酸。呢份柚子氣泡咖啡以柚子醬配Tonic Water,再畀客人倒入濃縮咖啡,可以自己控制濃度。咖啡烘焙香氣濃郁,加上柚子同Tonic Water嘅天然甜味同氣泡感,清爽消暑。

手作巧克力($48)
手作巧克力($48)

朱古力亦落足心思,店主用70%朱古力粉先煮成醬,相比起直接沖泡,朱古力醬唔單止更濃郁同帶出可可香,口感亦會更厚滑!飲落果然有香濃朱古力味,加上牛奶嘅甜味平衡啱啱好,厚身得嚟又順喉。

日常
日常
日常
日常



日常
地址:西環西營盤第二街128號海昇大廈第二座地下H號舖




文、相:Cathy.H

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能