提早出門避一劫 吳綺莉險成塌棚亡魂 不安失眠

跑馬地前日發生棚架倒塌事故，女星吳綺莉於意外前半小時路經此地，可謂執番身彩！不過，她所住的大廈因暴雨漏水導致停電，要摸黑度日之餘，還要沖凍水涼，禍不單行。

熱帶風暴「獅子山」襲港，前日於3號風球加上黑色暴雨警告下，跑馬地發生大型棚架倒塌事故，釀成一死一傷。原來意外發生前半小時，吳綺莉剛路過肇事地點，與死神擦身而過！

昨日凌晨時分，她在社交網發文，講述逃過一劫的經過：「逃過一個災難，到現在都睡不着，就在我行過這條路的半個小時後就出了意外。一個很努力的女工冒着風雨上班，而離開了我們，我們活着的每一個人還有甚麼需要投訴，人生實在太無常了，希望一個善良的人一路好走！」不少網民替她抹一把汗，叮囑她出門要小心，同時寄望死者安息。

本報昨日聯絡吳綺莉，她表示能夠安全無恙，絕對要感謝一位長輩及天父：「當日有位長輩約我早啲出門口去處理一啲事，先可以避開一劫。冇諗過咁大件事，導致一位女工過身，聽到個心好唔舒服，打工搵餐飯食但遭遇不幸！」更指獲悉事件後，整晚都未能入睡。

大廈停電 摸黑度日

不過，由於所住大廈外牆漏水，導致總電箱壞掉，整幢大廈停電，她說：「電熱水爐冇電，沖凍水涼都係小事，因為細個喺泳隊習慣沖凍水，但夜晚要摸黑度日，惟有點蠟燭，好似好浪漫咁。大人還好，鄰居有小朋友，要搬出去住幾日，希望快啲整好啦！不過諗深一層，相比起人命傷亡，我呢啲都只係小事一則。」