揭破舊愛出軌呻失敗 唐詩詠終極醒覺 戒Check另一半手機

唐詩詠學懂成熟處理感情事,現時靜候Mr. Right從天而降。
唐詩詠學懂成熟處理感情事,現時靜候Mr. Right從天而降。

「絕世好女友」唐詩詠近日分享戀愛史,自爆試過狂Check舊愛出軌證據,亦被舊愛偷看手機中與友人的對話內容。她先後與崔建邦及洪永城拍過拖,引來網民競猜誰是出軌渣男,但詩詠昨日為新劇開工時卻封嘴,表示誓不開估,更指已從經歷中成長,相信下個男友會好幸福!

視后唐詩詠日前在網上節目大談情史,自言有超強第6感,很快識穿男友出軌並搵到證據。她又自爆曾被舊愛Check手機對話內容,認為對方根本不相信她,可謂最失敗的愛情經歷!

陳山聰自誇資質好

回復單身一段時間的她寄情工作,昨日偕陳山聰為無綫回歸劇《我的驕傲》開工,飾演夫婦的他們抱住一對小朋友,拍攝在馬路邊觀賞傳聖火的場面,山聰透露是模仿「歌神」張學友2008年代表香港傳聖火一幕:「呢25年來香港經歷好多嘢,劇入面會有啲畫面穿插。(有冇特別場口?)我演主旗手,詩詠係獸醫,我哋有兩個仔女。(演主旗手好難?)有專人指導咗5日,我資質好,正常要訓練兩年,因為所有動作都有規格。」

詩詠重提自揭情史一事,笑言只是普通貨色:「其實每10個人入面,起碼一半經歷過。(依家唔Check男友?)呢個係非常之壞嘅習慣,有呢個舉動係因為內心好想搵對方唔好嘅嘢,咁樣會好多不安,令到同另一半相處發生好多唔開心事,所以最緊要醒覺。(你以往拍拖都唔開心?)拍拖總有開心同唔開心,只要好好成長就OK。」

她曾公開與崔建邦及洪永城拍拖,引來外間競猜誰是那個出軌舊愛,她說:「我唔會講,大家唔使估,因為我人生唔係只拍過兩次拖。(依家處理感情成熟晒?)相信會,所以下一個(男友)應該會好幸福。(搵男友係咪今年嘅生日願望?)又冇,我相信緣分會跌落嚟。(搵金牌媒人林盛斌幫手?)唔使,我等佢自己跌落嚟!」

陳山聰與唐詩詠演夫婦。
陳山聰與唐詩詠演夫婦。