【搭飛機挨後坐=自私?】網民:個設計係畀人挨後張椅架嘛!

撰文:飛天中女Juicy媽

【親子王國分享】香港人最鐘意去旅行,一年都搭唔少次飛機。有時想瞓教,少不免想挨後張凳,有JM話上飛機之後挨後瞓教,結果畀坐後面的人搵空姐投訴。有大量JM都話,做人要將心比己,挨太後真係會影響到人!亦都有JM覺得,搭得經濟倉預咗有人挨後,點解要理你感受?!我就羅列咗雙方嘅爭拗點,你哋又覺得邊方好啲?



 

反對挨到最後嘅原因:

會令到後面個位更窄

一挨落去好自然後面嘅空間會窄咗。而家有啲廉航坐位本身已經夠窄,就算前面無挨後,個位已經頂到膝頭。有JM試過前排的一家3口長期挨後,連上飛機餐時,空姐叫極都唔肯較返上,要人地唔上餐俾佢地,佢地先肯暫時教番好張櫈,迫到近窗果兩位XXL碼外國人,要沿櫈爬出來至去到廁所!

影響後面乘客使用枱面食飯/用電腦/睇戲

食飯時通常空姐會叫乘客拉直椅背,如果唔係個位會好窄,前面挨到最低的話,烏低會頂頭,根本食唔到嘢!個電視一下子近到去鼻尖,點睇?用電腦既仲會因為張凳頂到而開唔晒個MON。

突然挨後 嚇你一跳

除咗挨後會阻到後面之外,如果突然挨後都會影響到人!有JM試過,前面啲人一挨落來,啲餐具跌落個身到,仲差啲夾到JM個女個頭!又有JM試過,開咗notebook,前面位人兄好大力咁突然挨後張櫈,夾爆左佢部notebook角,心痛死啦。

 

挨到最無問嘅又會咁睇:

設計係咁就預左有人挨後

如果唔可以挨後,點解又解要設計到張櫈可以挨後呢?要鬧就要鬧設計果個!長途機點都要要瞓教,唔通咁都唔畀挨後?

我有權挨後,你都可以

挨後係乘客搭飛機既權利,你都有權行使我嘅權利。如果唔想畀人影響,可以選擇坐商務倉或者頭等!我理你感受,邊個理我感受?

 

公說公有理,婆說婆有理,咁樣拗落去講到世界末日都未有結論!Juicy媽就覺得,成個POST最重要嘅係呢四個大字—「將心比己」!我成日都教兩個仔要有同理心,唔可以淨係諗人,亦都要顧及人哋嘅感受!見到有小朋友跌低,我會帶埋阿仔幫手扶佢起身,問下佢會覺得小朋友痛唔痛,不知不覺間培養佢嘅同理心。

以呢件事為例,Juicy媽我平時搭飛機都好鐘意瞓覺,挨後係絕對無問題,不過要睇情況!長途機挨後係在所難免,十幾個鐘坐直個人點捱?不過如果坐廉航短途飛日韓的話,我就好少挨後了。眾所周知廉航啲位有咁窄得咁窄,伸吓腳都成問題!前面果個挨後咗就真係逼到喊!你話小小都接受到,挨到最後真係行出去都成問題!我好認同一位JM所講,雖然每一樣物件設計出嚟,無明文帶出是否有搔擾別人的可能性,但作為一個有社會經驗、人際經驗及同理心嘅成年人,冇理由唔知自己嘅行為會為別人帶來不便掛?

 

呢個問題唔淨止困擾香港架,Juicy媽我就試過喺日本搭夜行巴士由東京去大阪,司機就提醒乘客如果要挨後,應該禮貌咁同後面果個打聲招呼先,唔好嚇親人。喺香港咁樣做又唔知work唔work呢?

即上討論區一齊傾


即睇下一篇:【兒歌好處多】揀咩歌畀仔女聽?SEN小朋友點樣專心聽歌?創作人:聽母語最好!

你可能還想看