搵奶奶同阿媽比較?網民:諗太多

親子王國 Baby-Kingdom.com

撰文:飛天中女Juicy媽

【親子王國分享】

奶奶對新抱好唔好,點為之好,係一大不解之謎。



有媽媽係網上討論區度傾訴,喺奶奶屋企倒瀉碗湯,奶奶冇關心自己不特止,仲一副嫌棄佢嘥咗啲湯咁嘅樣。如果係自己阿媽,一定會叫佢行開,清理現場兼要佢換褲。

有人話,都唔細喇,要咩幫手嘅咪自己出聲囉,唔使吓吓旨意人哋服務周到嘅。同埋奶奶同阿媽邊有得比,你又唔係佢生出嚟。有啲媽媽網民仲話自己小朋友倒瀉湯,都唔會呵護備至,而係話佢幾句等佢知道自己浪費食物。

不過大人大姐,又唔係貪玩倒瀉,同教小朋友唔同講法喇。有網民都話,就算唔係屋企人,見到朋友或者客人整濕,都會嗱嗱臨幫手,點都唔會黑口黑面、肉赤自己碗湯先掛。Juicy媽好認同喎!有時唔係期望人哋湊住自己,或者當自己係女咁錫。客客氣氣都好呀,至少唔好畀臉色我睇先喇。

或者天底下最尷尬嘅關係就係名義上係親人,但實情就係人生行咗幾十年之後先識對方,根本一啲都唔親密。於是,呢種高不成、低不就嘅關係,會令人對對方有期望,期望落空就會產生不滿。最怕都係把口講錫到你燶,但硬係有說話聽有臉色睇。

網民話:婆媳之間充其量係同事關係,你冇得揀,但又唔可以避開。除非轉過份工(搵過個老公)嘅啫。Juicy媽覺得呢個心喻真‧到位,不過又唔使太灰嘅,就算係同事關係,都有機會遇到好同事。真係相處唔嚟嘅,就唔好太有期望,咪唔會點失望囉!



即刻Click入討論區一齊傾


即睇下一篇:'仔女都患癌,我擔心永遠無機會抱孫…'

其他內容