摸Pet Pet :「小四」介入 蘇志威重拾初戀 劉小慧隔世感覺 再續人狗緣

·2 分鐘文章
蘇志威與劉小慧視愛犬如親人,照顧得無微不至。
蘇志威與劉小慧視愛犬如親人,照顧得無微不至。

「得閒修女」劉小慧視愛犬Scooby為「小四」,見老公蘇志威被濕吻舔勻全身,卻沒半點醋意,皆因多得牠的出現,令另一半更黐家,且深信輪迴轉世之說,認定Scooby就是亡犬「小腳板」的化身,有緣遇上只為再續人狗未了情。

劉小慧帶同標準貴婦狗Scooby於飛鵝山的豪宅受訪,愛犬體重及高度等同6、7歲的小朋友,全身毛茸茸,樣子超可愛,恍如變大了的《花生漫畫》狗主角Snoopy。而狗狗對蘇志威(蘇老闆)表現癡纏,眼神從不離開主人外,又不停送上法式濕吻及熊抱,令他冧到面露罕見的「初戀feel」笑容。

小慧表示:「Scooby特別黐我老公,兩人咿挹到做『小三』嗰隻貓都要隨屋屙洩憤,老公以前唔係成日喺屋企,但為咗陪隻狗多咗留家,仲試過遲到返工,我哋養過咁多隻狗,未見過佢會幫狗梳毛。」蘇老闆讚Scooby冧功一流:「佢朝朝都會跳上床錫醒我,我去到邊都黐住我腳邊,佢真係好得意。」

付出300%愛

小慧覺得和Scooby邂逅是緣分的安排,記得為高加索愛犬bear bear舉行水療火化時,在最傷心之際,狗殯儀的店長胖胖安慰她:「隻狗竟然識用手搭住我,覺得呢種標準貴婦狗好有靈性,咁啱朋友有狗BB送畀我,就係同胖胖一樣品種嘅Scooby。」她又指會付出300%愛Scooby,全因深信牠是過世的古代長鬚牧羊犬「小腳板」轉世:「我對『小腳板』好慚愧,覺得對佢係最好,佢離開時,我叮囑佢記得下世返嚟搵媽媽,而Scooby細個時個樣、感覺,同『小腳板』係一模一樣嘅。」

撳鐘仔冇甩拖

蘇老闆就讚Scooby有12歲小朋友智商,超聰明到識撳鐘仔代替說話:「佢想出街同食飯就撳唔同色嘅鐘仔,一次都冇撳錯色。佢又鍾意玩波波,不過唔係狗玩波,係狗玩人,因為掟到佢覺得玩夠先肯停。」

Scooby小資料

品種:標準貴婦狗

性別:雄性

年齡:11個月大

體重:50幾磅

身價:5至6萬元

注意事項:要提供足夠空間給狗隻走動,需要主人多陪伴,每個半月到美容院剪毛,食有機生肉糧及寵物保健品,每月花費逾6千元。

雖然Scooby是雄性,但同性相吸,最愛黐實男主人。
雖然Scooby是雄性,但同性相吸,最愛黐實男主人。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能