摸PetPet:衝破心理陰影 再做狗奴 可宜愛犬公主病 駁嘴脾氣臭

·2 分鐘文章
可宜太愛Mallow,就算牠亂發脾氣也忍氣吞聲。
可宜太愛Mallow,就算牠亂發脾氣也忍氣吞聲。

混血主播可宜多年前深受愛犬離世的打擊,原以為不再養狗,最近卻被西摩犬征服而決定再當狗奴。可宜自言或許太過溺愛縱容,令愛犬由乖乖女變港女,不時發脾氣兼駁嘴,但又非常黏人,令她心甘情願服侍公主。

可宜最近收養了一頭西摩犬BB女Mallow,現時5個半月大,又圓又白十足棉花糖,可宜說:「其實佢個名叫Marshmallow,即係棉花糖,我想佢好似棉花糖咁軟腍腍又香噴噴,不過個名太長,所以叫佢做Mallow。」她稱4年半前第一隻飼養的愛犬離世,令她與家人難以接受並留下陰影:「佢係急病走,前一日仲行得走得,突然就行唔到,去獸醫途中就走咗,真係好難過。我覺得自己唔會再養狗,咁啱有個親戚好急要離開香港,養唔到Mallow,有咁嘅機遇,令我再想養。」

整營養餐 服侍公主

可宜坦言因之前愛犬猝逝,加上Mallow初回家時不小心從床上跌下來,令她對Mallow格外細心照顧,如公主般看待:「佢食嘅嘢全部係天然,我會研究喺邊個地方入口,我又會整營養餐畀佢食。」她懷疑自己是否太過溺愛Mallow,令牠變成港女般性格:「佢以前唔會吠,仲以為佢係啞,但依家成日吠,你喝佢,佢會吠番你轉頭,變成一個多嘴港女。有時我太晏返屋企,佢就會發脾氣,搞到全屋紙碎,又會摷垃圾桶。」

性格熱情 係人都跟

雖然Mallow偶有小姐脾氣,但個性黏人又熱情,令可宜不得不愛:「就算凌晨4點我去廁所,佢都會起身跟住我去廁所。見到其他人嚟屋企,佢會逐個打招呼,有人送貨,佢跟到人出電梯口,差唔多要跟人走。」

白雪雪軟綿綿的西摩犬,怎不令主人自甘為奴?
白雪雪軟綿綿的西摩犬,怎不令主人自甘為奴?
正所謂血濃於水,Mallow遇到自己友零舍興奮。
正所謂血濃於水,Mallow遇到自己友零舍興奮。
就算「非我族類」,一樣玩得咁癲。
就算「非我族類」,一樣玩得咁癲。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能