操弗身形拍動作片 泳兒恨演奸角 睇齊吳彥祖

近期少入戲院的泳兒前晚出席首映，欣賞吳彥祖主演的電影。她希望像「男神」一樣突破自己，最想挑戰反派角色，自覺可以操弗做打女。

由吳彥祖、王千源、衛詩雅、春夏及鮑起靜主演的英皇電影《除暴》今日上映，前晚於尖沙咀戲院舉行特別場，周家怡、泳兒、楊天宇、曾樂彤及艾妮捧場。該片在內地叫好叫座，票房勁收約6.5億港元，男主角吳彥祖非常期待電影在港上映：「我哋整個團隊包括導演、監製、演員及工作人員都付出最大努力，希望香港觀眾喜歡這部電影。」

已有一段時間沒有入場睇戲的泳兒透露，非常期待偶像吳彥祖的破格演出，更希望像他一樣演反派：「我都好想做反派，我睇落好似弱質纖纖，以前客串嘅角色比較貼近我嘅外形，再有機會演戲，想演同我不一樣嘅角色。除咗反派，覺得自己有潛質，操弗身形拍動作片。」而楊天宇出道以來多演乖仔角色，看到吳彥祖突破演出，他亦想演奸角，就算剃頭亦沒問題。

周家怡享受與影帝鬥戲

至於周家怡、曾樂彤與艾妮笑言捧好姊妹衛詩雅場，周家怡說：「有個鏡頭，佢個頭要『嘭』一聲撼落地下，真係好搏。」提到周家怡與曾樂彤有份演出另一部英皇電影《金手指》，有幸與影帝梁朝偉同場，問到會否緊張到腳軟？周家怡說：「知道有份演出就開始緊張，但真正去到現場開工就好享受，佢係好好嘅前輩。」曾樂彤則說：「身邊所有人都問我同影帝合作緊唔緊張，但開工當日，着好戲服就希望做足本分，唔會特登諗同咩人合作。」歌手艾妮表示很想演戲，自信能接受任何挑戰，笑稱強項是易肥易瘦，隨時能為角色增肥或減磅。