操盤手札記│期權:資金管理VS風險管理(割柑人)

·3 分鐘文章
期權:資金管理VS風險管理
筆者早前提過操作期權如同營運一盤生意,咁做生意係咪賺錢,最主要睇:①資金管理、②風險管理。

剛過去嘅7月,港股由憧憬「七翻身」慘變「七翻艇」。恒指上周最為顛簸,頭兩日各跌逾1,100點,後兩日共升逾1,200點,翌日再跌逾350點,全周累跌1,360點或5%,全月累跌2,866點或10%。科指跑輸恒指,全周、全月分別累跌7%及17%。中資科網股、教育股被監管鐵拳重擊,估值腰斬。當中,藍籌ATMX都見恐懼鬥「質」,睇港股跳水,比睇奧運跳水更刺激!

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

中外資金爭相流出港股,北水連續10日流走共444億元,全月流走共635億元破紀錄。恒指上周五收25961,夜期低水105點,ADR比例指數則低11點。後市要睇能否反彈重越下降軌,初步阻力喺10天線同近日跌浪0.618倍反彈所在嘅26600水平,下一阻力喺上周一下跌裂口頂部同250天牛熊線所在嘅27200水平。踏入8月,本周多隻藍籌放榜,小心唔係見光起,而係見光死。

減倉套現泊入指數基金

雖然資金流走,但追蹤恒指嘅盈富基金(2800)同追蹤國指嘅國企ETF(2828),上周成交大增兼反錄資金流入,上周五更分別打入成交榜第五、第六位。大戶撈底?未必。上周四場內期貨結算,翌日場外結算,指數基金交投活躍,一來關套戥事,二來相信係大戶為免個股政策風險過高,減倉套現泊入指數基金管理風險。要等指數基金成交同吸資回落,先係風險胃納恢復嘅訊號。

筆者早前提過操作期權如同營運一盤生意,咁做生意係咪賺錢,最主要睇:①資金管理、②風險管理。先講資金管理,良好嘅資金管理其實就係合理嘅資產配置,即係手頭現金相對股票、債券、外滙、物業等嘅比重。做期權最重要嘅資金管理,就係保留足夠現金嚟做按金。至於風險管理,做期權最大嘅風險,就係股價波幅太大,Short Put(賣出認沽期權)同Short Call(賣出認購期權)所收期權金,唔夠彌補帳面虧損。

波幅大宜Long 波幅細宜Short

期權策略變化萬千,但萬變不離其宗,都係由四種基本策略演變而嚟,除咗上述提到嘅Short Put、Short Call,仲有Long Put(買入認沽期權)、Long Call(買入認購期權)。簡單嚟講,預計升得快,做Long Call;預計跌得快,做Long Put;預計跌幅有限,做Short Call;預計升幅有限,做Short Put。

睇港股上周走勢,似係喺25000至26000震盪築底,預計反彈浪未完結,但反彈空間亦有限,想同個市一齊滑浪,不妨吼下盈富基金。盈富係同大市同步,可以利用期權Short Put盈富,以較市價低嘅行使價,收期權金等接貨,代替買入現貨。

當你手上有貨,亦可以喺大市抽高時,以較市價高嘅行使價做Short Call,收期權金等出貨。不過,要注意嘅係,本周多隻大藍籌出業績,波動難免。如果無貨做Short風險高,但可以同時開Long做保護(即係做spread),控制風險。

割柑人

曾任財經記者、編輯,在本港報章撰寫財經專欄逾十年

www.fb.com/hkstockpicker

本欄逢周一刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能