操盤手札記|能源另類反向指標(割柑人)

·3 分鐘文章
能源另類反向指標
中國限電限產,皆因電力短缺,電荒背後,又同煤炭價格瘋漲有關。

上周五,美國公布被稱為「恐怖數據」嘅零售銷售數據,9月出乎意料不跌反升,加上業績期打頭陣嘅「百業之母」銀行股,季績都好過預期,雖然10月消費者信心指數創10年新低,但無阻美股升勢延續,道指、標指、納指分別再升1.1%、0.7%、0.5%。港股ADR比例指數亦高水0.5%,滙豐(005)ADR更高水1.2%。今日市場聚焦兩件事:①中國公布第三季GDP;②港交所(388)推出A股期貨。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

「煤超瘋」蠶食利潤

中國喺第三季重啟嚴格嘅疫情防控,加上房地產調控、限電限產,第三季GDP能否「保五」成疑。市場預測均值係按年增長5%,個別投資銀行睇得較淡,高盛估計按年增長4.8%,按季零增長。中國限電限產,皆因電力短缺,電荒背後,又同煤炭價格瘋漲有關,皆因中國仍以火力發電為主,佔電力供應七成,而「煤超瘋」蠶食利潤,部分電廠寧願減少發電,以免蝕本。

上周五,中國三大煤炭價格同創新高,動力煤、焦煤、焦炭分別升8%、6%、8%。今年以嚟嘅資源商品龍虎榜,動力煤以1.5倍升幅稱冠;亞軍係硅鐵,升1.4倍;季軍係焦煤,升1.2倍。三甲之中,煤佔兩席。「煤超瘋」利煤炭股,不過,短炒無妨,長揸無謂,畢竟煤炭不符國策。國策係點?上年12月中央經濟工作會議提出八大任務,第八項係「做好碳達峰、碳中和工作」,即要減碳,向新能源轉型。

《經濟學人》跌眼鏡

唔止中國,其實全世界都提倡減碳轉型,可惜新能源如風力、水力、太陽能發電都要望天打卦,極唔穩定。以歐洲風電為例,按照計劃,2019至2021年應該每年增長逾14%,但實際上,兩年間反而減少逾20%。新能源嘅計劃發電量同實際發電量出現缺口,需要舊能源——燃燒化石燃料(煤、石油或天然氣)發電填補,導致燃料需求大增,價格大漲。新能源發電嘅落差,係能源危機同能源價格波動一大原因。

講到能源走向預測,不得不提《經濟學人》封面,可謂反向指標。早於2003年10月25日嗰期,封面為「The end of the Oil Age」,然後,油價4年間升近3倍;較近期有2020年9月19日嗰期,封面為「21st century power: How clean energy will remake geopolitics」,然後,今年以嚟,綠能ETF投資回報普遍仍為負數;之後2020年12月5日嗰期,封面為「Making coal history」,然後,煤唔止無成為歷史,煤價更創歷史新高,上年12月至今升逾兩倍;最新上周六嗰期,封面為「The energy shock」,配圖係天然氣露出類似名畫《The Scream》嘅表情,又睇下準唔準。

光大環境可留意

減碳轉型大趨勢下,喺中國從事環保能源項目、環保水務項目等嘅光大環境(257)不妨留意。集團嘅能源項目包括垃圾發電、沼氣發電、光伏發電、生物質能發電、污水源熱泵等。集團上半年多賺28%,中期息多派36%至每股0.19元。展望未來派息,彭博綜合券商預測,全年每股派息0.372元,預測股息率5.9厘;至於估值,彭博綜合券商預測,今年每股盈利增長24%,預測市盈率5.2倍。

割柑人

曾任財經記者、編輯,在本港報章撰寫財經專欄逾十年

www.fb.com/hkstockpicker

本欄逢周一刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能