操盤手札記|阿爺派糖 先益銀行(割柑人)

阿爺派糖 先益銀行
以分行網絡計算,滙豐係內地最大外資銀行,可望搶佔理財通先機。

第三次試底!港股連跌4日、累跌1,538點後,上周五反彈252點,收24920;升勢並獲成交配合,錄得1,938億元。不過,富時換馬收市後生效,刺激尾市交投,因此未能視為大成交推動大市築底反彈嘅佐證。而且,圖表上7月、8月、9月三度試底,第三隻腳愈踩愈深,呈一浪低於一浪,唔排除反彈過後再試低位,殺一殺24000至24500牛仔。夜期已轉低水137點,港股ADR比例指數亦低水112點。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

由於中秋假期,內地本周一、二休市,香港周三休市;滬深股通、港股通周四復常。本周焦點落喺美國聯儲局本港時間周四凌晨2時公布議息結果,焦點中嘅焦點,係睇會否公布縮減買債時間表。觀望儲局放鷹定放鴿,加上消費者信心不及預期,美股三大指數上周五喺「四巫日」(指數期貨及期權、股票期貨及期權四期結算)跌0.5%至0.9%。9月以嚟,投資者風險情緒一直降溫,市場主要操盤手點睇?

芬佬操作 睇淡但唔做淡

睇淡,但唔做淡!美銀9月全球基金經理調查顯示,喺變種病毒威脅經濟復蘇下,預期未來幾個月經濟走強嘅受訪者只有13%,遠較3月時峰值91%為低,亦係上年4月疫情擴散全球以嚟最低。儘管睇淡經濟,基金經理股票照買,淨增持比例達50%,遠較20年平均值29%為高。點解咁反常?皆因錢太多!67%基金經理認為,當前流動性係2008年金融危機以嚟最好。

據美銀分析,經濟無咁樂觀,對股市嚟講反而係好消息,因為意味低息將會持續,而喺投資者對債券失去興趣下,股市出現「TINA」(There is no alternative)現象,即喺超低債息下,投資者「別無選擇」,唯有買入股票賺取較好回報。有趣嘅係,喺基金經理減持債券、現金,增持通脹相關嘅銀行、商品、原料股時,預期通脹上升嘅比例又跌至兩年最低。咁矛盾嘅經濟、配置、通脹、倉位操作……媽,我好亂呀!

滙豐再跌 撈底價值更大

即使芬佬繼續買入股票,但變種病毒威脅、經濟增長放緩、刺激政策淡出等因素一直困擾市場情緒。對於中港股市,更有監管風暴、恒大(3333)爆雷困擾。不過,驟雨中亦有陽光,A股指數期貨、跨境理財通、南向債券通,短短1個月,跨境金融互通措施相繼開通,成為金融股甘霖。當中,滙豐控股(005)中銀香港(2388)更備受青睞,雖然上周呢兩隻藍籌港銀隨市回調。

以基本因素睇,若滙豐再跌,撈底價值只會更大。一來,據高盛、摩通等大行分析,以分行網絡計算,滙豐係內地最大外資銀行,可望搶佔理財通先機;二來,喺本地企業債發行市場,滙豐長期係龍頭,亦可望搶佔債券通先機;三來,滙豐上月公布中期業績時,表明打算提前喺今年落實派息比率40%至55%,按市場平均預期滙豐今年每股盈利0.57美元計,每股派息為0.23至0.31美元,按現價40.25元計,股息率為4.5至6厘。

割柑人

曾任財經記者、編輯,在本港報章撰寫財經專欄逾十年

www.fb.com/hkstockpicker

本欄逢周一刊出