操盤手札記│Cyber Monday大平賣（割柑人）

上周五係感恩節翌日Black Friday（指商戶促銷後盤數由赤字轉黑字），對環球股市嚟講，真係黑色星期五！事緣約三周前，非洲發現新冠變種病毒Omicron，比印度發現嘅Delta變種病毒傳染力更強，世衞上周五召開緊急會議應對，消息引發全球憂慮，主要股市全線大跌。今日係感恩節後嘅周一Cyber Monday，睇嚟股市會繼續大平賣！話時話，世衞原本對新冠變種病毒以希臘字母順序排名，但今次跳過Nu同Xi，以Omicron命名，點解？世衞並無解釋。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

香港爆出亞洲首兩宗相關感染，嚟自富豪機場酒店群組，上周五港股急跌2.7%，區內最傷，夜期未止跌，低水1.2%，ADR比例指數更低水1.3%。歐美股市方面，泛歐Stoxx 600指數急跌3.7%，美股三大指數急跌2.2%至2.5%，恐慌指數VIX急升54%至28.62。避險情緒升溫，資金湧入債市，債價急升、債息急跌，美國10年期債息由1.641厘跌至1.479厘，跌16.2點子，係上年3月美國爆發疫情以嚟最大單日跌幅，反映市場預計聯儲局將維持低息更耐。

阿里港股已入無圖之境

恒指7個交易日出現4個下跌裂口，上周五裂口打穿11月10日低位24481，收24080，夜期收23800，ADR比例指數收23764，恒指短線有機打穿10月5日低位23681。不過，指數現已跌近周線保歷加通道底部（現處23717），唔排除快將見底，並且形成雙底。港股幾時見底，要睇「水」，尤其北水，但近日北水南下淨流入減少，上周五得9.6億元，按日大減26.8%。講到尾，若博反彈只宜小注。

股市大跌，受疫情消息同監管消息夾擊嘅科網股重傷，藍籌ATMX中，阿里巴巴（9988）最傷，雖然股民築起「血肉長城」護價，喺130元價位排出2,500個買盤，但一沖即散，並以全日低位129.1元收市，跌4.7%，再創2019年來港上市以嚟新低。想撈底睇乜位？阿里港股已進入uncharted territory，睇阿里美股圖，支持位為2018年12月低位129.77美元，以1股ADS換8股港股計，折算每股約126港元。阿里美股日均成交較港股多7、8倍，比港股有say。

半導體ETF食元宇宙條水

跌市之下，疫苗股、晶片股相對硬淨，例如復星醫藥（2196）只跌0.6%，ASM太平洋（522）只跌0.9%。先講疫苗，針對Omicron病毒，BioNTech（BNTX）、Moderna（MRNA）等藥廠正在研究疫苗，據BioNTech講，可於六周內改良疫苗、100日內出貨，而復藥正係BioNTech疫苗大中華區總代理。至於晶片，無論元宇宙概念、新能源槪念，都要高速運算支援，驅動晶片需求。講開元宇宙，估計遲早有樓盤改名「元宇宙」，「你住喺邊？」「元宇宙！」幾型呀！

言歸正傳，元宇宙仍為當前熱炒槪念，尤其晶片股。三星資產約三周前喺香港推出三星彭博環球半導體ETF（3132），追蹤彭博環球半導體二十大指數，頭三大持股係美國上市嘅Nvidia（NVDA）、台積電（TSM）、ASML（ASML），上市第二周起接連破頂，上周始見回吐。想跟潮流炒美股，但又唔想捱眼瞓，不妨考慮呢隻ETF。

割柑人

曾任財經記者、編輯，在本港報章撰寫財經專欄逾十年

www.fb.com/hkstockpicker

本欄逢周一刊出