支持本地出品！深水埗新Taproom + Cafe 抵食二人Fusion套餐

OpenRice開飯喇
·4 分鐘文章
支持本地出品！深水埗新Taproom + Cafe 抵食二人Fusion套餐
支持本地出品！深水埗新Taproom + Cafe 抵食二人Fusion套餐

深水埗有唔少文青Cafe，但呢間9月底新開嘅小店就集Taproom同Cafe於一身，可以飲到本地品牌嘅精釀啤酒，又或者飲本地烘焙嘅咖啡配Fusion菜式！搵嚟法國藍帶第一名畢業嘅廚師作為顧問，菜式有新意而價錢貼地，係約飯局嘅好選擇呀。

桂月位於深水埗汝州街，因為喺農曆八月開業，而農曆八月正值桂花盛放之時因而又名桂月。幾位店主希望營造一個環節舒服嘅小店畀大家聚會，店內嘅壁畫係本地藝術家嘅作品，其他油畫亦係香港學生作品。

餐廳設有18個Tap頭，供應Heroes、Carbon Brews、Yardley Brothers、大圍啤等本地品牌嘅精釀啤酒
餐廳設有18個Tap頭，供應Heroes、Carbon Brews、Yardley Brothers、大圍啤等本地品牌嘅精釀啤酒
Mango Sticky Mango（$70/Half，$128/Full）
Mango Sticky Mango（$70/Half，$128/Full）

啤酒會不定期轉款，都會以本地精釀啤酒為主。例如呢杯店主推介係Yardley Brothers出品，靈感嚟自泰國嘅芒果糯米飯，入口真係飲到芒果嘅酸甜同椰子嘅香氣，口感亦比一般啤酒厚身啲，真係有還原到芒果糯米飯！因為果味重，店主指大部分客人無論男女試完都鍾意。

牛奶咖啡（$42）
牛奶咖啡（$42）

咖啡同樣選用香港Roaster，本地烘焙咖啡豆亦會不定期轉款，有機會今次嚟飲到Nutty嘅豆，下次再嚟已經換成偏果香或者帶花香嘅豆啦。好似今次拍攝飲到嘅Latte就甜感較高，帶榛子風味。

朝日（$45）
朝日（$45）

咖啡亦可以做成特飲，呢杯朝日就用咗柚子梳打配搭濃縮咖啡。未飲先聞到柚子嘅柑橘香氣，搞勻飲落就係柚子嘅酸味同咖啡嘅醇香平衡，加上梳打嘅氣泡感，清爽醒胃。

全日供應二人套餐（$258）
全日供應二人套餐（$258）

唔單止飲品出色，食物亦一樣有水準，皆因特別請嚟搵嚟法國藍帶第一名畢業嘅廚師作為顧問。特色係喺西餐當中加入港式食材或者中菜元素，想試下嘅話最抵食就係全日供應二人套餐，有齊湯/沙律、小食、主菜、飯/意粉。

二人套餐前菜：是日餐湯（圖左）或精選沙律（圖右）
二人套餐前菜：是日餐湯（圖左）或精選沙律（圖右）

例如圖中嘅黑松露野菌湯、南瓜忌廉湯；前者富松露幽香、後者味道香甜，而且口感都相當Creamy柔滑。精選沙律用料亦夠新鮮，簡單以胡麻醬調味，味道清新。

二人套餐小食（三選一）：啤酒醬炸魚柳
二人套餐小食（三選一）：啤酒醬炸魚柳
二人套餐小食（三選一）：黑松露薯條（圖左），香辣雞翼（圖右）
二人套餐小食（三選一）：黑松露薯條（圖左），香辣雞翼（圖右）

小食就以香口炸物為主，最特別嘅係炸魚柳配啤酒醬，其實啤酒味道唔會太重，而係有淡淡啤酒麥芽香，味道清爽可以減低炸物油膩感。黑松露薯條外脆內棉，加埋黑松露醬係無得輸嘅配搭。香辣雞翼嘅雞皮非常酥脆，裡面雞肉又Keep到嫩滑，香辣惹味。

二人套餐主菜（三選一）：慢煮豬鞍配玉桂蘋果醬
二人套餐主菜（三選一）：慢煮豬鞍配玉桂蘋果醬
二人套餐主菜（三選一）：紐西蘭肉眼扒配燒汁
二人套餐主菜（三選一）：紐西蘭肉眼扒配燒汁
二人套餐主菜（三選一）：香煎比目魚配特色白酒香草醬
二人套餐主菜（三選一）：香煎比目魚配特色白酒香草醬

三款主菜各有特色，開飯仔私心最鍾意係慢煮豬鞍配玉桂蘋果醬，一改豬扒平時偏韌嘅睇法，慢煮豬鞍口感相當鬆化嫩滑，加上香氣十足嘅玉桂蘋果醬，酸酸甜甜咁同豬鞍又夾。紐西蘭肉眼扒配燒汁就勝在肉眼肉質軟滑、油花分布細緻，入口鮮嫩多汁。香煎比目魚皮脆肉嫩，配搭微酸嘅白酒香草醬可以提鮮。

二人套餐飯/意粉（四選一）：慢煮雞胸青醬意大利飯（圖左），南瓜蘆筍意大利飯（圖右）
二人套餐飯/意粉（四選一）：慢煮雞胸青醬意大利飯（圖左），南瓜蘆筍意大利飯（圖右）
二人套餐飯/意粉（四選一）：黑松露野菌扁意粉（圖左），明太子蟹肉扁意粉配帶子（圖右）
二人套餐飯/意粉（四選一）：黑松露野菌扁意粉（圖左），明太子蟹肉扁意粉配帶子（圖右）

主食仲有四款選擇，意大利飯口感偏軟，加上Creamy醬汁好有飽足感。而意粉就有香口嘅黑松露野菌同鮮味十足嘅明太子帶子蟹肉兩款任揀。

桂月
桂月

桂月
地址：深水埗汝州街75號地舖

文、相：Cathy.H