政府唔出聲 插畫師「被支持」一國兩制《基本法》

 

抗爭未完,政治話題如熨手山芋,你睇早幾日出事嘅Ming仔,唔夠一個禮拜,個facebook啲like冇咗3分1!   插畫師文地貓於facebook出post,話突然發現自己嘅作品,無端端出現喺撐一國兩制同《基本法》嘅宣傳品上。   事緣係今年3月,社會仲係風平浪靜,當時同某傳媒商談合作推出公民教育嘅月曆,傾到5月中就落實同簽約。   文地話有睇過往年嘅月曆設計,覺得「幾靚幾得意」,加上佢今年唔推出日曆,認為出個免費派發俾香港市民嘅月曆都幾好,而且內容係宣傳「關愛、責任、尊重與包容」,方向正面。睇過所有官方提供嘅文字內容,亦都冇咩問題。最多都係合作條款列明插圖只可宣傳免費月曆。   文地強調自己向來對同政府嘅合作小心處理,過去就勞工處的工作假期計劃合作,亦係覺得訊息正面先一路做。   到運動爆發,文地仲諗住自己啲插圖如果可以帶來一點安慰,都算係好事。而宣傳月曆嘅海報,layout都有俾文地過目。   點知最近文地有朋友收到一本「公民教育活動資助計劃」小冊子,上有大大隻字『「一國兩制」及《基本法》』,並配有文地嘅插圖。文地話完全唔知有呢份小冊子存在,又話如果知道有「一國兩制」及《基本法》呢2個元素,佢一定唔接。   而家文地正係同有關方面交涉,並且話「現在要生存,接job係非常提心跳膽」。   唔知官方有咩回應呢?會唔會係「手法唔完美,但可以接受」?原文傳送門