政情：中大醫學院論壇 拒陳沛然旁聽

香港中文大學計劃開中大（深圳）醫學院。中大醫學院尋日舉行論壇畀學生同畢業生出席了解詳情，公共醫療醫生協會副會長馮德焜同立法會醫學界議員陳沛然（Pierre）亦想去旁聽，點知被拒諸門外。

Pierre話當時在場職員話活動係優先畀學生同中大校友入場，但如果場內仍有空位可以畀佢進場，但佢等咗大約半個鐘都冇人通知有位。事後佢喺社交網站呻：「沒有諮詢文件的諮詢會，我坐了一個小時地鐵轉了四次車，未吃午餐趕過來，卻被拒諸門外。」佢又話早前已收到唔少醫科生同中大醫科畢業生就呢件事求助，覺得起醫學院係大議題，自己又係立法會衞生事務委員會主席，不禁反問：「到場了解事件都好合理啩？」

中大：不會安排教職員深圳工作

港大醫學院畢業嘅馮德焜對入唔到場覺得好遺憾，仲強調呢件事同公立醫院醫生有關係，因為公院醫生都擔心中大香港同深圳醫學院未來要大力增加資源，如果抽調咗啲本地醫學院教職員去深圳教書，即係本地啲醫科生變相要醫管局啲醫生幫手教埋。

不過，中大醫學院回覆話，活動目的主要係同學生、校友就有關議題交流會面，會上校方首次表明中大喺深圳開設嘅醫學院唔會喺明年招生，香港中大唔會安排教職員到深圳工作或教學；財政同資源亦唔會動用香港中大或教資會一分一毫。