政Whats噏:失言為沙士「冠名」 何啟明急忙拍片道歉

on.cc 東網
何啟明(圖)知道失言之後,尋晚急急腳拍片道歉,希望可以平息爭議。
何啟明(圖)知道失言之後,尋晚急急腳拍片道歉,希望可以平息爭議。

新冠肺炎疫情持續,立法會衞生事務委員會尋日(10日)召開特別會議,討論政府防疫措施,其中肺炎嘅名稱就成為議員爭拗焦點。勞工界議員何啟明質疑反對派議員將新冠病毒疫症稱為「武漢肺炎」係抹黑中國,反問:「唔通沙士又要加番『香港』兩個字?」但點知說話一出,何就即刻畀網民鬧爆,相隔兩個鐘頭左右,何急急腳拍片耍冧,為言論致歉,希望可以平息爭議。

何啟明發表沙士言論後,即刻惹起網上熱議,有網民批評何連源頭喺邊都搞唔清楚,亦有網友話多謝佢提醒大家沙士源頭係廣東省,就叫「廣東沙士」啦。唔知係咪睇到網民鬧爆,何啟明尋晚10點幾喺社交網站上載短片,佢話對於尋日朝早開會用咗一個唔恰當嘅例子,感到萬二分抱歉,又話「病毒無情,人間有愛」,希望港人喺依個階段可以團結一致,齊心抗疫。

其實何啟明拍片都係諗住息事寧人,不過有網友睇完短片之後仍然咬住佢唔放,仲留言鬧佢「無腦」同「無常識」。睇嚟呢次真係唔知點收科喇。事後再問番何啟明打算點拆局,佢就直認自己講多咗,勾起大家對沙士時期嘅回憶,話「錯就要企定」,惟有拍片同市民講對唔住啦。

至於有網民指出,何嘅Facebook都用過「武漢肺炎」字眼,佢就解釋話,當初新冠肺炎未有正式命名,依家已經冇再咁講啦;佢又提到之前去歐洲嘅時候,當地人見到黃皮膚嘅旅客都有所戒備,而當日佢喺會上嘅言論,只不過係想大家唔好再將新冠肺炎同中國掛鈎,但承認涉及沙士嘅言論係「講多咗」,就此向市民道歉,仲話現階段會繼續做番相關嘅防疫工作。

其實之前都有算命師傅話何今年運程麻麻㗎啦,話佢弱木命,今年庚子年,何金旺水旺,做咩都唔順,奉勸佢做少啲,擔心佢吃力不討好喎,冇咩運行之餘,仲要小心刀傷利器,出行小心交通咁話,總之全年就平平無奇,唔合格!咁睇嚟,何真係小心為妙好啲啦!

【相關搜尋】陸浩明指沙士「香港係病毒源頭」

你可能還想看