政Whats噏:周庭突關Fb專頁 為洗底保平安?

·2 分鐘文章
政Whats噏:周庭突關Fb專頁  為洗底保平安?
政Whats噏:周庭突關Fb專頁 為洗底保平安?

多名參與前年民主派「35+」初選,而被控涉違反《港區國安法》嘅立法會前議員同前區議員,近半年紛紛關閉或移除Facebook(Fb)專頁,被外界質疑係為咗洗底保平安。呢股「風潮」更延伸至其他民主派人士身上,其中因前年包圍灣仔警察總部案,被判囚10個月嘅前香港眾志成員周庭,喺今個月12日刑滿出獄。雖然佢過去一直活躍喺唔同嘅社交平台,但其Fb專頁今(28日)就被發現已關閉,唔通佢都有相同諗法?之不過,佢尋晚(27日)就仲喺另一社交平台Instagram(IG)轉發最新動態,見到佢已經換咗個新髮色添!

周庭喺出獄後隨即喺IG發文,話「痛苦的半年零二十天,終於完結了」,又話「接下來就要好好休息,養好身體,因為身體在這段期間變得太瘦弱了」,之後就較少喺IG同Fb貼文。之但係,佢嘅Fb專頁今被發現已關閉,顯示為「無法瀏覽此頁面」,至於佢另一個私人帳戶則冇受影響。

有別於喺Fb經常分享同時政有關內容,周庭大多數喺IG上載外拍相片同分享個人感受,雖然佢已經有近兩個星期冇再更新IG貼文,但佢尋晚就有轉載髮型師嘅限時動態。上年6月先第一次染髮嘅周庭,今次就再挑戰較為新潮嘅造型,下半截頭髮已經染成淺粉紅色,仲話「我個頭終於返來了」,髮型師更叫佢整靚個頭先繼續好好休養添啊。都係嘅,周庭在囚逾半年,出返嚟都真係要打理吓。

雖然佢已就包圍警總案服刑,但佢上年8月就因為涉嫌違反《港區國安法》中嘅勾結外國或者境外勢力危害國家安全罪,被警方國安處拘捕,唔知關閉社交專頁又係咪一個可行方法保平安呢?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能