政Whats噏:尹兆堅獄中首次缺席子女生日 感內疚將來補

·1 分鐘文章
在囚中嘅尹兆堅首次缺席一對仔女生日。
在囚中嘅尹兆堅首次缺席一對仔女生日。

前議員尹兆堅因去年六四集會非法集結案,,早前被判囚10個月,但其實佢早於今年2月就因為涉去年民主派35+初選案被還押。尹嘅Facebook今早(28日)轉發佢嘅獄中信,原來佢一對仔女就嚟生日,但在囚嘅尹就無法慶祝喇,仲係咁多年嚟首次缺席添!佢對此覺得好內疚,但無奈只能於唔知幾多年後出獄再幫仔女補祝返生日喇。

尹指佢嘅一對仔女都喺聖誕節後無幾耐生日,佢過往每一年都會提早安排好工作,及早返屋企同佢地慶生,從未缺席過,但可惜今年要缺席啦。佢話唔知道仲要缺席幾多年嘅生日會,覺得仔女因為佢嘅在囚,被迫要一夜長大,剝削咗仔女嘅童年,添上成人才應承受嘅壓力同埋憂愁,而佢今年初因為民主派初選案被押上庭嗰日,原來就係佢太太生日正日,佢都深感虧欠同內疚。

尹又請求仔女嘅原諒,「爸爸未能跟你們慶祝生日,你們一定諒解的,對嗎?原諒我,好嗎?」又應承仔女,無論係幾多年後都一定會出獄,再次幫佢地慶祝生日。最後佢再次形容自己係唔稱職嘅爸爸,未能履行應有責任,所以希望大家代佢向仔女送上生日祝福喎。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能