政Whats噏:慳電得消費券 林超英:已經兩年零電費

林超英話只要注意一啲生活細節,就可以慳返唔少電。
林超英話只要注意一啲生活細節,就可以慳返唔少電。

政府今年會唔會再派消費券,目前大家都係得個「估」字。之不過,天文台前台長林超英日前就獲得中電發放兩張面值50港元嘅消費券。雖然金額唔算好大,但佢都透過社交平台展示「戰利品」,仲好自豪咁留言話「少用電,努力得到認同。」到底今次佢有咩慳電方法,先至攞到呢個着數呢?

據了解,住宅用戶要攞到消費券,只要每兩個月一期嘅電費帳單,全年6張單夾埋嘅平均用電量唔多於500度就得嘞。而林超英嘅「成績」就較中電所設嘅門檻仲要低一半,約莫係200度左右。佢話唔好以為用咁少電,生活質素會大打折扣,只要注意一啲生活細節,就可以慳返唔少電。

佢話現任天文台台長鄭楚明曾經計過,若果電器用完之後就立即斷電源,可以節省1成嘅電力消耗,事關好多電器喺待機狀態下仍然會不斷消耗電力,所以佢每當就寢或外出,就連路由器嘅插蘇都掹走。當然,雪櫃係例外,而開熱水爐沖涼嘅時間亦都要短。佢又話今次得到消費券之外,已經兩年零電費啦!