政Whats噏:民主黨財困 減人手賣黨車

·2 分鐘文章
袁海文指民主黨已設法開源節流。
袁海文指民主黨已設法開源節流。

曾是泛民龍頭嘅民主黨(白鴿黨),因多名立法會議員請辭、大批區議員辭職或被政府褫奪議席,目前只剩九名區議員,導致該黨嘅收入劇減,加上籌款晚會因疫情而停辦,喺去年就已經話將會出現逾百萬元嘅財赤,如果現金流捱唔到去今年年尾,恐怕難以維持地區工作。以致黨內決定縮減人手、賣黨車及售賣紀念品,以應付日常營運開支。若果開源節流都捱唔到兩年後嘅區議會選舉,會唔會就此亡黨呢?

由於年前白鴿黨已預料會出現巨額財赤,早前就賣出荔枝角一個物業套現。舉辦黨慶晚宴同獎券籌款,係一項重要嘅收入來源,但礙於疫情同政治形勢,周年晚宴無法舉行。再加上過往立法會議員每人需籌20萬港元,惟該黨如今失去多個立法會議席,令黨籌少逾百萬元。

白鴿黨籌款委員會主席袁海文大呻時勢艱難,多名議員黨友因涉民主派初選案而被囚禁,再加上區議員黨友自行辭退、或遭政府褫奪議席,未能向黨上繳部分薪金。而過去一年該黨已經耗用300萬元資助地區據點,支援在囚黨友則用咗1100萬,指目前財政狀況之惡劣,實屬該黨創黨28年以來最嚴峻嘅時刻。

佢又話,知道未來有一定壓力,民主黨已決定出售黨車,員工人手縮減一半,未來將會計劃售賣紀念品,希望藉此籌得款項應付日常營運開支,至於黨員日後會否參選等未來路向袁就話,黨員各自同中委商討先至再作決定。

其實喺去年,白鴿黨唔派人參選立法會換屆選舉,不但惹來外界質疑未來4年如何維持收入,亦加劇黨內分歧同內訌,結果主張參選嘅白鴿黨「元老」李華明,去年擅自以個人名義支持黨外立法會選舉候選人,而遭到凍結黨籍半年,然而因配合調查程序,故暫緩執行處分。但副主席梁翊婷、中委蘇逸恒則被革除黨籍,後者更離港赴英。

民主黨深陷創黨以來最嚴峻嘅財政危機。
民主黨深陷創黨以來最嚴峻嘅財政危機。
我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能