政Whats噏:流亡美國「無信用」 梁頌恆租屋遇困難

·2 分鐘文章
政Whats噏:流亡美國「無信用」 梁頌恆租屋遇困難

人在異鄉,第一時間就係搵容身之所。因立法會宣誓風波而被港府褫奪議席嘅前議員梁頌恆,去年流亡美國之初,都係周圍咁搵屋住,然而當地嘅規矩,喺欠缺信用分數嘅情況下租屋可謂異常艱難,但後來有人肯同佢做擔保,先至唔使露宿街頭咋。

梁頌恆日前喺一個網台節目中提到,初到美國嘅流亡人士未有駕駛執照,搵屋必須符合兩個前提,就係間屋一定要就近地鐵站,同埋附近要有超巿、又或者鄰近有購買生活必須品嘅地方。之不過,就算符合呢兩個前提都未必咁容易租得到,事關當地人好現實,要業主願意租出物業,租客就要保證自己能夠準時交租。

而美國社會流行信用評分制度,如果一個人能夠按時繳清應交款項,如稅款、信用咭數之類,就會隨住時日提升佢嘅信用分數,而業主就會視乎租客嘅信用評分,以考慮物業是否租出。梁頌恆遇到嘅難題就係,佢要開始累積自己嘅信用分數,最好係藉住信用咭消費去建立,但係佢都未租到屋,又點樣向銀行提供住址證明以及申請信用咭呢?申請唔到信用咭,無法透過找咭數去累積信用分數,業主又點會願意出租物業呢?簡直係雞先定蛋先嘅問題啊!況且梁頌恆係流亡身份,喺當地不得工作,亦無法提交收入證明,好難通過有關財務嘅壓力測試。

咁多棘手難題,到底點樣解決呢?梁頌恆話幸好畀佢搵到移居美國多年嘅香港人,喺對方答應做擔保人嘅情況下,先至話有瓦遮頭囉。講到呢度,梁頌恆話相信好多流亡美國嘅手足,租屋之時都會同樣遇到信用評分嘅難題,所以佢度到一條「以當地智慧去解決問題」嘅招數,就係先由一個有信用分數嘅人租屋做二房東,然後再將間屋分租畀其他手足,咁三房客咪可以避開當地嘅信用評分囉!

至於梁頌恆目前嘅居所,平時就有一隻貓同5個人住。間屋除咗業主提供嘅基本施設,梁頌恆甚少添置傢俬,理由係方便搬走喎。照咁講,莫非佢又準備隨時走佬?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能