政Whats噏:英國生活好? 前區議員透露有港人無錢開飯

·1 分鐘文章
何致宏(左)同曾振興(右)都去咗英國。

政府要求區議員宣誓後,引起民主派區議員移民潮。不過人在異鄉,人生路不熟,生活都唔容易㗎。屯門前區議員曾振興同埋喺今年5月因患抑鬱症辭職嘅中西區前區議員何致宏都移居英國,佢哋日前就一齊喺社交平台直播,分享點樣適應當地生活,更指有啲當地港人連飯都無錢食呀!

講到生活上嘅困難,第一樣挑戰一定係語言,曾就回想番喺酒店隔離時,日日都睇當地電視台,跟住字幕讀,諗住學吓英文咁話喎,不過,佢都講笑隔離完就唔記得點講喇!就嚟到中秋,曾話知道有啲港人會去食燒味飯以解鄉愁,佢自己呢就最想食米線,但當地就搵唔到,睇怕都要佢落廚自己煮喇!

何亦透露,有部分港人更加係無錢開飯,生活使費都要慳住慳住,甚至唔開燈同埋足不出戶以節省電費。

有網民問佢哋會唔會再考慮參政,曾就話唔會喇,因為當地都有地區組織,加上佢覺得有責任先融入當地社會。何都話佢哋都需要啲時間適應當地生活先,至少識吓左鄰右里嘛。但何話佢哋都同當地嘅香港人有聯絡,盡量提供協助。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能