政Whats噏:荃灣豬肉檔AK爆紅 又嚟個福來邨Stanley?

荃灣豬肉檔AK」(右)同福來邨Stanley(左)相遇。

追星文化吹入政界!話說最近被發現「荃灣豬肉檔AK」後,好多粉絲去咗荃灣楊屋道街市「朝聖」,勢估唔到今日(9日)竟然見到佢!

佢係邊個?係荃灣區議員葛兆源囉!佢喺社交平台貼文,話趁假日陪屋企人去荃灣街市買餸,同朋友「阿威」合照係好合理嘅,而呢個阿威就係近日爆紅嘅 「荃灣豬肉檔AK」,葛兆源仲上載咗佢哋嘅合照。

呢個貼文同張相出街之後,惹嚟大批網友熱議。有網友叫佢唔好同啲粉絲爭,亦有網友質疑「咩料呀,你又去合照,佢竟然咁回應:「咁啱經過,畀佢捉住,你信唔信?有啲網友又讚佢靚仔過阿威,仲係福來邨Stanley添!事關佢區議會嘅選區就係福來邨。但佢唔敢認,話唔想敢得罪啲粉繼喎。

另有網友亦質疑「議員都玩打卡」,仲問佢係咪「豬肉粉」?佢即刻話強調絕無此事,又話自己都有好多「葛」粉。可能網友太多意見,佢都招架不住,突然拋咗句「唏噓嘅豬肉佬+唏噓嘅議員係好合理」。咦!戴咗口罩都見到佢哋笑緊,仲豎起拇指,又有幾唏噓呀?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能