政Whats噏:高血壓有樣睇?3議員邊個夠健康

on.cc 東網

【on.cc東網專訊】美國收緊血壓高指標,唔單止令到有分量嘅人要緊張,連平時睇落Fit爆嘅人都要小心啲!新嘅指標係上壓130、下壓80,議會入面有咩議員血壓超晒標?今次搵嚟運動健將鍾國斌(Felix)、高大健碩嘅尹兆堅(肥尹)同身形苗條嘅葛珮帆(EQ)做個比併,結果會唔會出乎意料之外呢?


Felix就話自己游開早水,有時間就去游,而且帶住條健康手帶Keep住Check心跳,佢仲好自豪咁話,平時啲心跳一分鐘都係40幾或者50幾下,好Fit!Felix今日(15日)嘅血壓係上壓122、下壓81、心跳64。一睇見個數,Felix就話「唔準嘅,個心跳都唔靚仔,如果50幾我就滿意喇!」平時喺議會入面坐定定,個數實好靚,但畀班非建制衝出嚟,可能就會嚇到個心離一離。


肥尹未量就先講,自己幾年前驗身啲血管彈性係Number One㗎,咁依家呢?肥尹今日上壓係139、下壓99,都超少少喎!佢好感嘆咁講,以前做區議員仲可以擠啲時間出嚟去做Gym,依家做咗立法會議員,多嘢做之餘,仲要留守議會無時間做運動,搞到呢幾年肥咗成20磅。肥尹唔單止肥咗,仲蝕咗,佢話以前做Gym買咗100堂教練,但用咗10堂就無再去,嗰度都幾萬蚊㗎喎!不過咁,肥尹都話呢啲指標唔好睇得咁死,過幾年又會改吓,身體情況係點都係要問番醫生先最清楚。


咁多位男士量咗,終於有女將出場!EQ今日上壓111、下壓71,睇嚟佢嘅數字係靚絕全場喎,新舊指標都無超標,真係Keep Fit有道。EQ話自己好早期已經開始保持健康,均衡飲食同多數運動,正所謂預防勝於治療吖嘛!佢仲話依家個數咁靚,都係有賴於自己超過30年食素,同埋保持常常樂觀嘅態度。

【更多即時新聞詳情請上東網新聞

其他內容