政Whats噏:15歲初戀曾被求婚 哪吒認好Dry

on.cc 東網

【on.cc東網專訊】常言道事業得意,愛情就失意。屢敗屢戰、政途坎坷嘅立法會補選新界東候選人兼西貢區議員方國珊(哪吒)嘅愛情會唔會較得意?哪吒趁情人節大爆自己曾經被求婚,情竇初開於15、16歲時。佢又話雖然單身自由,但都好Dry喎!


哪吒鮮有談論自己嘅感情事,今次就喺Facebook上載短片公開戀愛史。佢話今年已經係第20幾年單身過情人節,多數都係工作或見朋友度過,之前就拍過幾次拖,曾經有男友去外國讀書,佢見親張相就會喊,所以將張相放喺枕頭底,佢覺得自己對眼識講故事係最吸引嘅。咁有無人求過婚?佢就大方承認有,之前個Ex曾經暗示想結婚,不過佢就想做嘢同覺得自己未Ready(準備好)。


佢又覺得女強人係難啲搵男人,話男人都鍾意好柔弱、好溫馨同好嗲嘅女人,其實只要係自己鍾意嗰個人,佢都得㗎喎。佢嘅團隊再玩大啲,問佢如果可以借種生仔,民建聯周浩鼎、公民黨楊岳橋等人會揀邊個,哪吒即刻話揀唔落手,仲笑稱網民見到實話「掉落海都唔益你」。兩位男士都已婚,想借種問過人老婆未㗎?


新界東候選人亦包括前民主黨成員黃成智、獨立人士陳玉娥、獨立人士趙佩玉、新同盟范國威及工聯會鄧家彪。

【更多即時新聞詳情請上東網新聞

你可能還想看