散發少女韻味 「小巨肺」譚芷昀大個女啦！

3年前只有9歲嘅「小巨肺」譚芷昀（Celine），遠赴美國參加綜藝節目《全美一叮》（America’s Got Talent），憑演唱偶像Celine Dion名曲《My Heart Will Go On》表現一鳴驚人，獲評審按下「Golden Buzzer」，令佢直入準決賽。唔經唔覺Celine已經12歲，仲長得亭亭玉立，真係大個女啦！

雖然當時Celine未能躋身決賽，不過佢贏得全球關注，工作排得密密麻麻嘅Celine，經常要到唔同地方工作，帶挈全家人由舊樓搬到千呎山頂豪宅，吸金力認真驚人。不過近日因為疫情關係，唔能夠周圍飛嘅佢，就活躍於個人社交網站及影片分享網站頻道。年紀輕輕嘅佢， Instagram已經擁有17萬名粉絲，而個人影片頻道更加高達約63萬名粉絲追蹤，受歡迎程度同一個藝人完全冇分別。

Celine嘅IG大部份都係佢嘅家庭生活照及出席活動照片，相中所見嘅Celine擺出唔同嘅後生女pose，眼仔碌碌配上棕色頭髮，散發出一陣少女嘅韻味，樣子開始帶點成熟，而當中同妹妹Dion嘅合照，Celine就好明顯回復一個大細路，擁有嘅童真出返晒嚟。