文凱玲《衛斯理》演打女性感邪花其實是孝順乖女

東方新地 - 娛聞

更新日期： 2018年5月20日上午3:00

文凱玲(Connie) 之前喺電影《鴨王2》及《喜愛夜蒲2》中性感演出令人深刻，不過之前喺《賭城群英會》演出乖乖宅女，近日喺TVB播出的《冒險王衛斯理之支離人》又剪短髮做打女，形象突出！而現實中，Connie的確係美貌與智慧並重，佢喺香港大學心理學系畢業，做過空姐，身為家中長女，佢更加每月都把一半人工交畀父母，真係顧家又孝順！

撰文：東方新地｜圖片：新傳媒、劇照、微博

文凱玲《衛斯理》演型格打女

《冒險王衛斯理之支離人》中，文凱玲飾演殺手組織「黑天使」頭目羅剎，一頭白金色短髮非常有型，劇中亦有連場動作戲，同其餘靚女角色好唔同！文凱玲向來俾人感覺較柔弱、斯文，今次可算一大突破！

文凱玲去年處女拍劇

去年播出的TVB劇《賭城群英會》頗有新鮮感，請得四哥、叻哥及陳法蓉出山，馬國明、佘詩曼、黃浩然等一線演員坐陣，仲有劇集新貴何浩文及文凱玲！文凱玲劇中飾演電腦宅女黃小南，與阿佘、高Ling為三師姐妹，大多時候都係紥馬尾戴眼鏡的乖乖女look示人，夠晒「Girlfriendable」！

小背心短褲勁吸睛

雖然文凱玲呢個角色並不賣弄性感，但不時都會着短褲短裙仔晒美腿，早前一集見到佢着住件低胸小背心同超短睡褲仔，即時將阿佘同高Ling比下去！

泳衣戲勁吸睛

王晶出品例必大灑鹽花，而《賭城群英會》中亦有場泳池戲，高海寧著泳衣當然搶鏡，但亦有不少巴打大讚文凱玲身材均稱，兩位性感女神，真係勢均力敵。

Connie擁33D上圍加42吋美腿，喺《賭城群英會》中鮮有性感演出，呢一幕算罕有喇！

文凱玲 2010年港姐第八名

多年前做過空姐的Connie其實係港姐出身，2010年時佢以27歲之齡「掹車邊」參選，不過成績只得第八名，同屆冠亞季軍分別係陳庭欣、張秀文同莊思明。落選後，文凱玲並沒有和無綫簽約，但獲李蘊經理人賞識簽約為旗下藝人，先後參演多部電影。

落選後變晶女郎

落選後佢轉投電影圈，先後拍過錢國偉執導的《喜愛夜蒲2》同《喜愛夜蒲3》，以及多部王晶監製電影《唐伯虎衝上雲霄》、《賭城風雲II》同《鴨王2》等，力sell其33D上圍加42吋美腿。在《鴨王2》仲同何浩文有多場埋身肉搏戰！

同家人睇自己作品

文凱玲表示，除了《鴨王2 – 雞同鴨戀》之外，每套電影都同屋企人一齊睇，當中《唐伯虎衝上雲霄》有一幕係好清楚見到佢背面的下半身，但文爸爸安然接受，令佢好放心，佢指自己的人生要由自己決定。

Connie話從未想過能成為三級女星︰「當年選完港姐，第二日就繼續做番空姐，只係間中客串吓電影，點知晶哥搵我，喺電影《唐伯虎之衝上雲霄》飾演秋香，全裸騷股，都有同屋企人商量過，佢哋俾我好大自由度，叫我自己做決定。」

雖然要犧牲色相，但Connie認為很值得，「比起之前真係多咗機會發揮，多謝晶哥提拔同俾咗唔少意見我。」

派傳單幫補家計

近年文凱玲在影壇上工作量有增無減，收入大增，但佢唔會因此而做大花筒。形象性感的Connie是家中長女，也是經濟支柱之一。爸爸任職地盤工人，母為家庭主婦，家中有一弟一妹，懂事的文凱玲自小認為身為長女要為屋企出一分力，所以早喺15歲時已為幫補家計做兼職派傳單。而讀完書出社會工作後，文凱玲更把一半人工交給父母，其餘大部分人工儲起，以避不時之需，識諗又顧家。