【斥資逾千萬買樓築愛巢?】洪永城與女友梁諾妍愛得低調甜蜜拍拖行街

洪永城與梁諾妍
洪永城與梁諾妍

想當年洪永城(Tony)同「最不能錯過的女友」唐詩詠嘅感情,愛得低調但甜蜜,當時外界都認為佢哋會開花結果,不過拍拖兩年(2017年)就因了解而正式分開。分手後感情各自各精彩,Tony喺上年年尾被傳媒踢爆秘戀Model兼健身教練梁諾妍(Inez),其後Tony直認戀情。

喺上兩個月,Tony嘅「好兄弟」黃翠如生日就同一眾圈中好友慶祝。當時更貼上一張照片,發現Tony及舊愛唐詩詠亦罕有同場,見雙方未有尷尬下大方影全體相。其實Tony表示一早已向Inez申報會同舊愛同場,Tony為Inez打下超級強心針,表明自己就算同舊愛同場都完全冇野,冇下文只係純友誼。

其實Tony由出道至今都有唔少緋聞,以往對感情事吊兒郎當,大家覺得佢同「最不能錯過的女友」唐詩詠終會拉埋天窗之濟,點知Inez先係可以令到Tony收心養性,拍拖只係一年多就已經決定要定落嚟過安穩生活。有報道指Tony上年12月已經好大手筆,斥資逾千萬元購入兩房成為業主,買入觀塘一個千呎單位,唔通係準備築愛巢?

能夠收服到Tony,Inez嘅優點當然係多到數唔晒,難怪Tony都話Inez嘅優點可以講足一、兩個鐘。平日都有傳媒影到佢哋拍拖行街,有時週日會西貢放狗之外,能夠成為「最佳女友」嘅Inez亦會陪男朋友行商場去男仕部買男裝衫,全程唔玩電話!Tony拎起衫詢問意見,做女朋友嘅亦會盡答。

Tony曾經錯過一次「最不能錯過的女友」,未知今次會唔會捉實「最佳女友2號」做有腳雀仔呢?