新劇《BB大晒》全新班底演出 受肺炎疫情影響開工日期未定

吳岱融微博圖片
吳岱融微博圖片

由李佳芯(Ali)及黎諾懿主演嘅2018年無綫劇集《BB來了》以陪月為題材,講述新手爸媽嘅生活點滴。因為內容貼地,令唔少父母產生共鳴,而Ali喺劇中完美演繹新手媽媽嘅苦與樂,更憑角色贏得視后獎項。劇集叫好又叫座,梗係開拍續集啦,不過李佳芯同黎諾懿就無緣演出續集,改由馬國明及岑麗香主演。

既然男女主角換咗人,咁飾演佢哋父母嘅演員當然都要搵其他人啦,而吳岱融早前就係微博上載相片,兩家父母分別搵咗吳岱融、龔慈恩、李國麟及商天娥飾演,而有指吳岱融將會喺劇中飾演馬明嘅外父,淨係睇呢個卡士已經令人期待呀!

雖然唔係原班人馬,不過BB女就繼續由「允豬」擔任。喺《BB來了》嘅時候,劇組就搵咗7位初生BB嚟飾演允豬,而呢班小朋友而家已經2歲幾,當中2位仲有嚟《BB大晒》嘅面試,最後由鬼馬又表情多多嘅梁芯語小朋友繼續喺新劇飾演允豬。

大家都知道搵小朋友及動物拍劇集都較為困難,要佢哋聽指令或乖乖地都唔係咁易。而鑑於近日新型冠狀病毒肺炎疫情持續,令唔少公司及市民工作同生活都大受影響,對於藝人拍攝劇集進度亦有所延誤,《BB大晒》就撞正呢一個問題。

馬明返公司試新造型時順道接受訪問,佢就提及到只係返公司試新造型,自己喺抱小演員「允豬」之前做足防疫,要搽酒精搓手液先可以抱。佢仲話其實大家都比小朋友家長更擔心小朋友身體,希望佢唔好中招,真係有咩事都唔知點賠個女俾人,所以真實開工日期仍係未知之數,唯有喺家中熟讀劇本。