新春團年飯食咩好?5大特色中菜館推介

新春團年飯食咩好?5大特色中菜館推介
新春團年飯食咩好?5大特色中菜館推介

過完聖誕,過埋年,仲有一個月到就到農曆新年喇!講到新年最重要嘅,當然係一家人齊齊整整咁坐低食餐飯喇,介紹5間中菜畀大家選擇,一於一家人去食餐好,寄望新年健康、平安喇。

西九文化區靚景中菜 囍公館

去西九文化區野餐同飲咖啡就聽得多,但原來嗰度都有高質中菜食㗎。呢間現代手工中菜館佔地6000呎,採納開放式設計同埋以落地大玻璃連接戶外,食客可以對住180度嘅維多利亞港景色同戶外空間。食物方面就大玩fusion小菜同點心,招牌黑松露法葱炸子雞,選用本地新鮮雞,每日限量供應。食法有兩種,除咗食到炸子雞原味外另外配上黑松露醬同法葱醬,幾有新鮮感。創意點心如盆栽小蘿蔔同黑金雪山包都好有特色,啱晒相機食先。

圖: Krystal030、銀行妹

古迹唐樓中的粵菜 和昌飯店

灣仔有百年歷史嘅古迹「和昌大押」經過翻新後搖身一變,成為呢間粵菜廳,除咗有小菜同點心食外,仲有調酒區畀大家試下特色cocktails~餐廳理念主打老菜新做,重點推介菜式包括富貴牡丹花,呢道係好考刀功嘅手工菜式,選材方面會根據當日蝦嘅新鮮程度而定,首選係野生花竹蝦,鮮甜又彈牙。手工點心嚟講,三文魚煎釀茶香豆腐同龍井蝦餃都值得一試,兩者都加入清香嘅茶為元素,令味道更有層次。

圖: 餐廳Facebook
圖: 餐廳Facebook

荔枝角名粵菜館 大公館 

食開中菜嘅美食老饕們應該對荔枝角呢間名粵菜館唔陌生,招牌黑毛豬叉燒真係無得輸,燒至微微燶邊,肥瘦適中,肉質都好軟腍,加埋甜甜地嘅蜜汁,一碟唔夠食呀~清香柚子凍鮑魚係另一道好受歡迎嘅菜式,鮑魚炆得入味,因為凍食口感帶有少少彈牙,配上柚子粒多咗一入清香,好有驚喜。

圖: eunice2046

名廚主理中菜 滿樂中菜

位於戲曲中心內嘅中菜館,由有三十年經驗嘅中菜大師許美德先生及其團隊主理。必試係人人都鍾意食嘅片皮鴨,呢度嘅北京填鴨用咗從德國購入嘅烤爐,令鴨喺低溫下變熟,再加上長達36小時嘅工序,確保每隻鴨烤完後外皮脆卜卜,配埋自家調製甜麵醬、蘿蔔絲、酸甜嘅子薑、青瓜絲同京蔥絲一齊食,比坊間一般嘅片皮鴨味道更豐富。

圖: print__print

懷舊上海菜館 个園竹語

新鮮熱辣開業先半個月嘅上海菜館,裝修以个園為主題,好有古時上海嘅味道,而且設有8間獨立房間同8間半開放式房間,私隱度好高。名菜野⽣海⿂⼀夜情(⾺友、馬頭),漁民將新鮮嘅海魚或馬友清洗乾淨,置於海鹽調製嘅水中浸泡約15分鐘,拎出嚟並喺陽光下曬一日,第二日就立即食用。魚肉完美集合鮮、嫩、鹹、⾹於⼀身,無論清蒸定係⾹煎都一樣咁鮮味,啱晒鍾意食魚嘅朋友。

文: Yanica