新歌《玻璃心》被內地全面封殺 黃明志Facebook出PO反擊獲大批網民支持

由馬來西亞創作歌手黃明志及陳芳語合唱嘅《玻璃心》，YouTube上載短短十幾日點撃率已經超過1700萬。《玻璃心》MV以粉紅色為主，表面上睇係充滿粉紅泡泡嘅甜蜜情歌，但卻被內地網民強烈抨擊，更指佢哋辱華，指歌詞大部份係諷刺小粉紅，例如「不明白／到底辱了你哪裡」、「出征」、「共同富裕」、「玻璃心碎一地」及「別再攀岩爬牆壁」等等。歌曲引起內地網民不滿，除咗歌曲被下架之外，二人嘅內地社交平台帳戶亦隨即被封。

有網民指黃明志及陳芳語利用「辱華」話題，炒作騙流量及藉機賺錢。喺噚日（25日）黃明志就透過 Facebook出PO反擊，指《玻璃心》受到關注唔係因為首歌本身有幾勁，而係因為好多人已經覺醒，愛的人越多，代表共鳴的程度越大。又指如果單純為咗賺錢，佢肯定會選人、錢相較多嘅地方。佢又話好多嘢唔係用錢去衡量，更表示如果要佢放棄創作自由同理想，違背自己身為創作人嘅初衷，佢寧願唔要。另外，佢更話：「但我反而想著要如何運用粉絲效應去影響更多人來反抗鐵拳。因為我知道，當你對鐵拳默不吭聲，便等於在慫恿和助長，有一天，鐵拳遲早會打在你頭上，每個人都逃不掉…」

大批網民睇完呢個PO都紛紛留言支持佢，例如「這段話很有智慧也很有意義。想抹黑你的人就是那群等著伸鐵拳的人而已。加油」、「感謝玻璃心這首歌講出我的心聲」、「加油 ，不要聽別人怎麼說，很好聽啊，啊那些看到坑自己要跳進去的人那我們也沒辦法，腳又不是再我身上，所以囉～想信自己吧，加油」、「就是喜歡你的心態。加油加油！!」、「我願意陪你繼續幼稚」、「如果你係幼稚，佢哋又點會咁緊張吖，支持你」、「說得好，欣賞你，加油」、「加油,只要維持本心，何必理會不懂的人」及「說的很有道理，加油」等等。

另外，其實黃明志利用自己創作表達個人意見已經好多年，亦曾因創作而一度被馬來西亞警方拘留，廠商及廣告商亦都離佢而去，失去好多工作機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！