新蒲崗工廈有驚喜! 伊比利亞黑毛豬火腿窖新配套 11款Ham試食導「嚐」配7味創意料理

·4 分鐘文章

鍾意食Ham嘅朋友,好多時都會點份Ham & Cold Cut同朋友邊食邊傾偈。但開心share有時真係唔夠喉,想食得盡興啲而家可以去呢個西班牙伊比利亞黑毛豬火腿窖,享用全港首個、包含3個單元嘅「The Iberico Ham Cellar」特色體驗團過足口癮。呢個體驗團係新配套,打破傳統餐飲業形式,將導「嚐」同用餐體驗二合一。除咗有多達11款Ham同7道特色菜之外,仲有專人為你講解唔同種類嘅Ham有咩特別之處,部分仲會即切即食添!

第1單元 專人講解+品嚐6款Ham

品鑒房
品鑒房

第1單元喺品鑒房由專人講解並享用6款Ham、3款芝士、八爪魚腳同3款橄欖,同時配有西班牙氣泡酒畀你平衡味覺。

右至左為西班牙風乾豬背脊肉同豬頸肉
右至左為西班牙風乾豬背脊肉同豬頸肉

先試淡身、以西班牙黑毛豬風乾嘅莎樂美腸、辣肉腸同黑血腸,再到以栗子及橡果餵飼嘅西班牙風乾豬背脊肉同豬頸肉。背脊肉唔會覺得好油潤,而豬頸肉就油脂豐富啲。

同時備有芝士、八爪魚腳、橄欖等小食
同時備有芝士、八爪魚腳、橄欖等小食

想味道多啲變化的話,同場仲有西班牙有機伊南娜羊奶芝士、西班牙綿羊奶芝士(熟成15個月)、西班牙綿羊奶松露芝士、傳統西班牙餅乾畀你夾埋Ham一齊食。3款芝士嘅味道唔算好濃,而羊奶芝士都唔會好羶,冇蓋過Ham嘅味道又多份奶香。軟腍嘅西班牙加利西亞熟八爪魚腳就可以配西班牙去核青橄欖、西班牙混合橄欖或西班牙珍寶大粒橄欖一齊食。

西班牙塞拉諾白毛豬火腿配蜜瓜
西班牙塞拉諾白毛豬火腿配蜜瓜

第1單元以風乾醃製20個月嘅西班牙塞拉諾白毛豬火腿收尾。呢款Ham就咁食會太鹹,但配咗蜜瓜可以帶出肉嘅甜味,又減輕油潤感覺。

第2單元 探索亞洲首個黑毛豬室內火腿窖

黑毛豬室內火腿窖
黑毛豬室內火腿窖

一隻隻豬髀掛晒喺度唔止壯觀,未行埋去都聞到好濃嘅鹹香味!豬髀上嘅色牌代表其黑毛豬血統純度同食咩飼料,黑色牌係橡果飼嘅100%純血統黑毛豬,紅色牌係橡果飼嘅75%血統黑毛豬,而綠色牌係穀飼嘅50%血統黑毛豬;不過100%純血統黑毛豬基本唔會風乾60個月,因為味道會過鹹同影響肉質。

有5款Ham即切即食
有5款Ham即切即食

喺呢間房會有5款橫跨唔同色牌同風乾月份嘅伊比利亞頂級火腿即切即食,而橡果餵飼嘅味道會相對香甜啲:
西班牙黑毛豬火腿32個月(穀飼)
西班牙黑毛豬火腿48個月(橡果餵飼)
西班牙黑毛豬火腿60個月(橡果餵飼)
西班牙黑毛豬火腿48個月(栗子餵飼)
西班牙黑毛豬火腿48個月(雙倍橡果餵飼)

第3單元 伊比利亞黑毛豬元素之7道菜單

「The Iberico Bar」開放式私人廚房
「The Iberico Bar」開放式私人廚房

由米芝蓮星級餐廳Écriture副主廚Heloise Fischbach設計嘅7道菜單,全部都貫穿伊比利亞黑毛豬嘅元素。

左:法式黑毛豬骨清湯 | 右:白汁半熟蛋黃配西班牙黑毛豬火腿粒
左:法式黑毛豬骨清湯 | 右:白汁半熟蛋黃配西班牙黑毛豬火腿粒

以西班牙黑毛豬火腿薯餅、血腸薯仔餅同48個月黑毛豬火腿佐洋薊沙律作為前菜之後就飲湯喇。法式黑毛豬骨清湯唔似日式豬骨湯,冇咩油膩感,而且濃到好似未開稀嘅精華,可能有朋友會覺得過鹹添。而白汁半熟蛋黃配西班牙黑毛豬火腿粒幾有驚喜,蛋味非常濃郁同香滑,又有鹹鹹嘅火腿粒增加口感。

香煎西班牙珍寶紅蝦
香煎西班牙珍寶紅蝦

紅蝦出名鮮甜度極高,而呢道香煎西班牙珍寶紅蝦煮嘅時候畀火「燒」過,令香料嘅味道更加滲入蝦肉之中。拆蝦時建議大家先放塊麵包墊底,索晒所有蝦膏就唔會錯過每滴精華喇。

香煎高級伊比利亞黑毛豬梅柳肉
香煎高級伊比利亞黑毛豬梅柳肉

最後係香煎高級伊比利亞黑毛豬梅柳肉,焗完都非常軟腍,而且肉味偏清甜,落少少鹽提味已經好足夠。

The Iberico Ham Cellar 體驗團價錢:團體預訂:$3,980(每次最多接待6位客人)| 單人預訂:$680
供應時間:星期二至五:18:30-20:30(逢星期六、日及星期一休息)


The Iberico Ham Cellar 體驗
地址:新蒲崗五芳街28號利森工廠大廈6樓601號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能