【旅遊業寒冬】不敵疫情 郵輪慘成夕陽行業？嘉年華拋售13艘船

全球新冠肺炎確診人數已經增加至多於1千3百多萬宗，美國仍然每日有5萬多宗感染，雖然歐洲等地都開始放寬防疫措施，但講到想重新去旅行嘅話，相信今年都未必得喇。疫情影響之下旅遊業中嘅航空、酒店業自必然係最大受害者，不過最快頂唔住嘅可能係郵輪業，鑽石公主號5分1旅客中招事件，可以話徹底擊潰郵輪業。日前公主號郵輪總公司「嘉年華」就宣佈出售旗下13艘郵輪喇。

3個月蝕40億美金

新冠肺炎未爆發前，郵輪業可以話係迅速增長嘅業務之一，每年新船一艘接一艘，而且設施一艘比一艘豪華，尤如海上皇宮一樣。郵輪業過往幾年火速增長，由2017年2,670萬人次，以每年6%向上升，原本2020年就預計人次會超過3,000萬，特別係亞洲區每年更加以20%幅度增加，多國都不停興建郵輪碼頭予郵輪停泊，明顯係想分一口肥肉。今年一場疫症，多艘郵輪先後爆發疫情，目前全球400多艘郵輪幾乎全部停駛，作為全球最大郵輪公司，擁有公主號郵輪、冠達郵輪等，單單計第二季已經蝕咗40億美金，每月都燒緊錢，一個月最多燒成6.5億美金！嘉年華4月時已經發行咗40億美金債券，並計畫再多發行10億，日前更宣佈拋售旗下13艘郵輪，不過復航無期情況下，邊個願意接火棒呢？

全球郵輪業公司股價大跌8成

目前全球最大郵輪公司，除咗嘉年華之外就係挪威郵輪及皇家加勒比海郵輪，疫情之下3間公司股價累計跌咗8成。疫情之前市場估計郵輪業市值3,500多億美金，3大巨頭佔咗8成，即係每間公司平均佔900多億，一程屬於短途郵輪旅程，例如台灣去日本7天遊，就可以為公司帶嚟超過200萬美金收入，每艘船都可以話生金蛋嘅雞。

全球4萬人仍滯留船上

大家於屋企奮力防疫期間，又知唔知原來全球仍然有42,000幾人仍然滯留於郵輪之上？全球郵輪業員工共有20萬，約有5分1人於疫症初期出航嘅郵輪上工作，有唔少郵輪至今仍然未能泊岸，或者泊岸但唔准船員離船，無國家願意收留，成為「無主孤塊」，只靠定時嘅補給去補充船員生活所需，唔少船員都滯留船上超過半年未能登岸，莫講話返屋企陪伴家人，連人工都無！呢42,000幾人可以話係疫情中其中最大受害者之一。曾經有多艘郵輪都出現有船員自殺，例如嘉年華旗下帝王公主號滯留荷蘭鹿特丹港時，一位39歲烏克蘭船員就忍受唔住，跳海自殺。

7月尾首度復航 台灣出發

目前全球郵輪公司之中，只有馬來西亞雲頂集團（即香港人最熟悉「星夢郵輪」母公司）宣佈旗下「探索夢號」將於7月26日由台灣開始環島之旅，基隆港出發至澎湖、馬祖、金門。公司話探索夢號已經得到醫療級衛生防疫認證，全船已作徹底消毒，希望可以為全球旅客帶來一次展示，令旅客對郵輪業重拾信心。郵輪上採用全新通風系統，所有客房及公共場所提供100%戶外空氣，絕唔會循環使用，減低病毒傳播機會。市場反應又如何？原來一直至8月嘅航程都已經爆滿，可見只要有信心保證，大家仍然未離棄郵輪。

總結：價錢會令旅客心軟

目前全球共有400多艘郵輪，要全面復甦似乎仍要一段時間，不過從探索夢號可見，只要旅客對該地區及郵輪有信心，加上價錢夠平的話，仍然係會搶住報名；同樣情況相信都會出現於香港旅客身上，畢竟一向話香港人最鍾意旅行，過往多次事件證明，就算目的地出現政變、地震、火山爆發都好，香港人仍然照出發。希望各大郵輪公司可以撐過疫症，他日再度復航之時，話唔定會出現「一位難求」情況呢！