日夜趕工 以為就死 Edan兩度暈倒傳入院

傳入院的Edan(左),昨日上載開工照報平安。
傳入院的Edan(左),昨日上載開工照報平安。

男團MIRROR人氣成員Edan成歌影視大忙人,拍劇、拍戲之餘還要主持綜藝節目,排山倒海的工作量令其身體響起警號,昨日被爆身體不適匆忙入院,其經理人公司否認:「冇咁嘅事。」但他開Live自爆兩度暈倒拍攝現場!

Edan最近忙於拍攝ViuTV偶像劇《i.SWIM》,又趕錄遊戲節目《膠戰S2》,加上應付新歌宣傳、各式各樣的商演及時尚品牌活動等,工作排得密麻麻!MIRROR成員面對密集式工作,開通宵已屬平常,當中姜濤上月出席活動時曾經當場暈倒,昨日又傳出Edan身體不適入院,其經理人公司否認,而他亦上載自拍照賣萌,搞笑自爆生眼挑針。

好樣衰搵窿捐

不過,Edan的健康的確令人憂心,他日前在直播中自爆拍攝《膠戰S2》期間,因暈眩而要暫停錄製:「我太耐冇做運動,嗰日跑完坐低就嚟死咁,想暈想嘔標晒冷汗,Feel到好唔妥。24歲仔未試過咁嘅情況,好驚,我就話『我唔得啦』,因為成身濕晒,所以即刻換衫,嗰日通宵拍完仲走去拍戲,好誇張!」

類似事件原來不止一次!他透露首次為《i.SWIM》練水時,導演、監製與教練都在場,令他承受很大壓力:「未熱身就跳落水,游咗25米蛙式,游完隻腳好緊,好似腫咗,啲筋硬晒,之後上水同成班人一齊熱身,做做吓開始暈暈哋,真係好𤓓!唔通同大家講頂唔順想抖吓,真係好樣衰,心諗可能係太焗,跟住繼續熱身,突然眼冒金星,我真係暈,突然好似成個畫面變咗一點點黑色,即刻有人扶住我,嗰下真係想搵窿捐。」其後他睇醫生接受身體檢查,心臟與身體都沒有大礙,Fans大可放心。

而明晚播出的《膠戰S2》以「小學雞玩的遊戲」為主題,Edan與嘉賓阿冰相認,原來2人是小學同學,並分享小學趣事。

Edan反白眼重演暈倒一刻,睇見都心痛。
Edan反白眼重演暈倒一刻,睇見都心痛。