日本電視節目來港探討「7月日本有地震」流言 七仙羽親解散播原因

香港人一向鍾意去日本，不過呢大半年都有人引用日本漫畫家龍樹諒嘅作品《我所看見的未來》，從而傳出「今年7月日本有大地震」嘅流言，令到香港同台灣飛日本嘅機票同酒店，喺近幾個月大幅跌價。日本氣象廳長已經公開辟謠，而《我所看見的未來》原作者更推出新作澄清。

日本電視節目Mr. Sunday (Mr.サンデー)喺最新一集探討呢個話題，仲特地去到香港進行採訪，搵被指有份將傳言推波助瀾嘅七仙羽受訪。節目首先交代傳言來源，指七師傅年初叫大家4、5月唔好去日本，而人稱「鬼王」嘅潘紹聰喺2月底嘅節目提及《我所看見的未來》，並且搵咗3位占卜師預測，結果當中2位認為7月5日唔會有地震。節目推測，2項資訊因此被人誤讀，以訛傳訛之下變成「4月後唔好去日本，7月5日會有大地震」。

節目中，七師傅澄清自己只係預測4至5月嘅事，冇提過7月會點，而且認為「7月唔會有災難」。話雖如此，但係電視台做街訪時，絕大部份人相信日本7月5日有大地震，可見流言已經大幅散播。

有香港網民提及呢個日本節目，擔心會被日本人認為香港人迷信。有在日港人聲稱，節目中七仙羽話日本4至5月發生咗地震，應驗咗佢嘅預言，因此7月唔會再地震。

今年2月，七仙羽預言緬甸會發生地震，結果3月底緬甸真係出現7.9級大地震，令唔少人嘖嘖稱奇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！