喺fans幾經催促之下，MIRROR去年正式成立官方歌迷會，並以MIRO稱呼會員。今日歌迷會公布續會安排詳情，但係出post冇耐已經引起唔少fans不滿。

歌迷會列出11項會員福利，最吸引可能係包含珍藏版相冊嘅會員禮盒。至於唔少鏡粉入會都想有嘅MIRROR演出活動優先購票權利，歌迷會個post只係列出有預訂／參加嘅機會。

有fans就覺得續會好似只係得到一堆「機會」，但會方又冇交代到底有幾大機會可以參加。

另一樣令歌迷討論嘅係續會會費安排。今次官方歌迷會按會籍到期月份劃分會費，會籍一律去到年尾，而去年越早入會嗰批，今年反而要俾多啲。例如會籍5月到期嘅會員就要俾260蚊，相比去年440蚊年費，其實仲貴咗。至於9月份俾嘅只需要俾100蚊，10－12月到期嘅直情唔駛俾錢！而今年新入會會費係300蚊，即係話早嗰批入會會員，要俾差唔多嘅錢去續會。而且今年會員登記期至月底，過咗就冇得再入會。

MIRROR多位成員即將舉行個人音樂會，而明年一月舉行嘅團隊個唱，除咗係補返去年個唱取消之後嘅場次之外，亦應該會加開幾場，好可能要成為MIRO先可以有優先訂飛……嘅機會。有歌迷認為，而家呢個做法，係以鏡仔團show及個人音樂會「引誘」會員續會。

鏡粉又認為，去年入會之後冇幾多福利，最多只係迎新禮物同埋優先訂演唱會飛，今年續會嘅福利又只係得一堆「機會」，甚至連參加同IG LIVE無異嘅網上見面會都當係福利，都惹來幾大反應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！