旺角新開親民價高質壽司小店 $1追加海膽三文魚籽拖羅蓉手捲

·4 分鐘文章

有質素嘅壽司唔係只出於日本老師傅之手,旺角呢間新開嘅親民價壽司小店,由擁有12年高級Omakase經驗嘅90後坤師傅創辦兼主理。佢希望大家喺度食到特別得嚟又平價啲嘅款式,為食客帶嚟更多新鮮感。食材每日由日本直運到港,更選用日本富山縣天特A級天盛米加上秘製赤醋,製作Omakase常用嘅赤醋飯。事不宜遲,即刻睇下有咩時令壽司啦!

旺角新開親民價高質壽司小店
旺角新開親民價高質壽司小店

小店以灰白色為主調,遵從日本「侘寂」嘅簡約美學理念,連餐具、盛器至筷子托都採購自日本。雖然店舖面積唔大,但壽司吧檯設計充滿日式小店風味,而且令每位食客都可以睇到師傅製作各式美食,增加視覺享受亦好似置身於日本。

活北寄貝壽司
活北寄貝壽司

活北寄貝壽司($48/件)

呢度嘅壽司由最抵食嘅三文魚($9)起跳,不過嚟得小店當然搵啲冇咁大路嘅時令款式啦。好似活北寄貝壽司喺坊間比較少見,雖然落咗主餐牌,但都要睇貨源質量,所以唔一定食到㗎。活北寄貝面頭灑咗少少青檸柚子,令味道保持鮮甜又有清新感,而且爽口肉厚令人好滿足。

銀鱈魚壽司
銀鱈魚壽司

銀鱈魚壽司($48/件)

京燒煮法嘅銀鱈魚食得多,有冇諗過可以整成壽司呢?銀鱈魚壽司有刺身同火炙版,呢款魚含豐富魚油,輕燒後逼出油脂令口感更香滑,有別於京燒味道濃重嘅感覺。

左:鹿兒島春子鯛壽司|右:江戶前沙甸魚壽司
左:鹿兒島春子鯛壽司|右:江戶前沙甸魚壽司

左:鹿兒島春子鯛壽司($48/件)|右:江戶前沙甸魚壽司($98/件)

店內有塊黑板寫而家嘅時令菜式,開飯仔當日就有鹿兒島春子鯛壽司同江戶前沙甸魚壽司。春子鯛係真鯛嘅魚BB,一條魚只係開到4件壽司,而家啱啱入季,係夏天魚壽司嘅代表作;肉質軟腍中帶少少爽口,加咗青檸柚子令本身嘅鮮甜味道更突出。試過淡口味嘅壽司就到濃味紅肉魚喇!近年多咗人食沙甸魚壽司,呢份都幾大件,落咗少少蔥蓉略微加添清新感。

時令限定Sushi Téng套餐
時令限定Sushi Téng套餐

時令限定Sushi Téng套餐($328)

有選擇困難嘅朋友可以揀主打時令限定Sushi Téng套餐,入面包含壽司8貫、御料理、吸物同兩道甜品。除咗海膽壽司同吞拿魚腩壽司係必備款式,其他壽司都由廚師發辦挑選最當造嘅時令食材。而套餐配搭嘅吸物野菜豆乳湯(單點$38)都用心製作,湯底用木魚熬煮,加入日本濃郁豆乳同新鮮蔬菜,比一般豆乳湯濃味。

壽司方面,開飯仔當日有鮮帶子、甜蝦、真鯛、日本白海膽、大吞拿魚腩、油甘魚、池魚同火炙銀鱈魚壽司,橫跨廣受歡迎同高級款式,配搭都幾用心。熟食嘅八爪魚煮到入晒味,亦好腍身。

甜品係固定款式,有小熊造型最中餅同自家製櫻花水信玄餅,前者嘅紅豆大大粒;後者嘅櫻花處理過所以略帶鹹味,配黑糖汁一齊食都幾夾。

腐皮烏冬
腐皮烏冬

腐皮烏冬($88)

除咗壽司,呢度亦有熟食丼飯同烏冬套餐。腐皮烏冬聽個名好齋?其實配咗日式炸雞2件、吉列生蠔2件同吉列炸蝦反卷1客。雞肉同生蠔都炸得啱啱好,外脆內裡juicy,加埋足料反卷,食晒都幾飽。

海膽三文魚籽拖羅蓉手卷
海膽三文魚籽拖羅蓉手卷

而家新張期間消費滿$80,加$1就食到海膽三文魚籽拖羅蓉手卷,面頭仲有食用金箔點綴,用料一啲都唔hea!


地址:旺角廣華街1號仁安大廈地下24A號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能