旺角發現激抵$30泰式海南雞飯!同場仲有$30泰式豬手飯、$18芒果糯米飯

·1 分鐘文章

年尾就遇到第四波疫情,唔少香港人都叫苦連天……不過開飯仔喺旺角區發現咗一間超平泰式海南雞飯!餐廳選擇唔多,只係賣四樣嘢,分別係泰式海南雞飯、泰式豬手飯、青木瓜沙律及芒果糯米飯。而海南雞飯同豬手飯都只係賣$30,又有堂食,旺角區嚟講真係好罕見。

超平泰式海南雞飯!
超平泰式海南雞飯!

唔好以為賣得平質素就唔好,海南雞飯表現絕對水準之上,都幾有誠意。選用三黃雞,雞味突出,製作方法呢就將原隻雞放入加咗香茅、斑蘭葉同檸檬葉嘅湯水裏熬一小時,雞肉滑嫩,而且所有雞肉都起晒骨,啖啖肉,點埋自家製酸酸甜甜嘅醬汁又幾開胃。而油飯都係用心之作,選用泰國香米,加入香料一齊炒香後再用雞湯煲,粒粒分明香料香氣突出。

海南雞飯
海南雞飯

泰式豬手飯用滷水汁滷製兩小時,入味肉質軟腍,而且皮都唔會太肥膩,送飯食一流。

泰式豬手飯
泰式豬手飯

另外兩個小食青木瓜沙律及芒果糯米飯都係正常水準,都只係賣$12及$18,食個飯再加個前菜或甜品都只係四十幾蚊埋單,絕對係糧尾恩物。

青木瓜沙律及芒果糯米飯
青木瓜沙律及芒果糯米飯

曼谷水門海南雞飯
地址: 旺角通菜街1A-1L號威達商業大廈地下M號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能