《智能愛(AI)人》陸永升呢做男一 與李佳芯馮盈盈展開三角關係

陸永
李佳芯, 陸永 & 馮盈盈
李佳芯, 陸永 & 馮盈盈

無綫新劇《智能愛(AI)人》(暫名)計劃9月初開拍,噚日就舉行開鏡拜神儀式,劇集搵嚟早前被飛出多套新劇嘅李佳芯(Ali)、陸永、馮盈盈及關楚耀等人主演,Ali今次挑戰高難度扮演機械人,仲會與陸永同馮盈盈展開三角關係,配搭充滿新鮮感,唔少網民都好期待佢哋之間嘅火花。Ali就話劇情講佢係一個機械人,咩都唔識咁去咗陸永屋企,而陸永屋企就淨係得佢同蔣志光,而Ali就年少無知咁鍾意咗陸永。另外,Ali仲笑話今次最大嘅挑戰係對住陸永要忍笑。

陸永喺2000年與C君組成「農夫」加入樂壇,唔經唔覺已經入行20年,雖然出道初期星途麻麻,不過「農夫」都有唔少代表作,例如《全民皆估》、《舉高隻手》及《風生水起》等等。近年陸永與C君伙拍Do姐拍《Do姐去Shopping》,憑住出色口才及轉數快入屋成功。密密接job嘅陸永更為唔少劇集演出,例如《女人俱樂部》、《殭》、《誇世代》、《婚姻合伙人》及《金宵大廈》等等。喺《婚姻合伙人》,陸永與林秀怡飾演一對「歡喜冤家」,佢繼續發揮搞笑本色,承包劇集大部份笑點,深得觀眾喜愛。今次陸永喺《智能愛(AI)人》升呢首次擔正做男一,飾演一位未來世界嘅售貨員。陸永就笑話搵佢唔係因為佢嘅顏值,而係佢嘅口才,喺劇中佢都係衰衰格格,主力sell喜感。被問到首次做男一感覺如何,佢就話自己鍾意做配角多啲,不過就冇話係唔係男一,因為都係襯兩位美女。

《婚姻合伙人》截圖
《婚姻合伙人》截圖
陸永 & C君
陸永 & C君