雅虎香港新聞 曾不滿佔中阻搵食 政治冷感媽媽首上街撐學生：沒有暴動
6月16日，200萬人走上街頭，一步一步，向傲慢政權宣示民意不可欺。黑衣人群帶著共同訴求：譴責鎮壓、撤回惡法﹑林鄭下台。
密密麻麻的黑衣人群中，有一位瘦小的中年女士，戴著黑色cap帽，黑色polo貼著「反送中」貼紙、扣上白絲帶，手持「學生沒有暴動」紙牌，獨自參與6.16反送中遊行，顯得有點怯生生。記者前去詢問她可否受訪，她回答說：「其實我係第一次……」
59歲的王女士，被問到走上街頭的原因，她一時語塞，然後哽咽，調整呼吸片刻，才紅著眼、聲音顫抖地說：「我係土生土長香港人嚟嘅，見到咁嘅情形，係唔想見到嘅，咪出嚟囉。同埋為咗下一代囉，因為50年不變，好快就到㗎喇……」她從旁邊市民接過一張紙巾，稍拭眼淚。
王女士直言，她從來都「唔關注、唔識」政治，以前殖民地時期，天下太平，小市民只要肯努力，就會搵到食。她小學畢業，便找到校工的工作，後來嫁了一個廚師老公，誕下兩女，才做全職媽媽，「我哋嗰個年代，搵食係好容易……辛苦啲、慳啲，都生活到。」到九七回歸，她視之為「必經之路」，「因為中國收番香港，你冇辦法，一定要咁。」甚至對香港、對一國兩制心存希望，相信可以「馬照跑，舞照跳」，生活安穩如昔。
2003年50萬人上街反23條，王女士顧住湊女，無暇理會。到2014年雨傘運動，她覺得佔中不和平、「阻人搵食」，對學生所為不甚理解，「我係唔支持㗎，我係（希望）唔好咁激動，凡事都係和平，好似而家遊行咁和平係冇問題㗎，就唔好話掟磚、掟盛，咁我係唔認同呢樣嘢……唔和平，同埋阻到人，因為好多人都要搵食。」但王女士也感到佔中後的香港變不一樣，是梁振英令社會撕裂。
前年林鄭上台，王女士曾經對她有所期望，「冇得揀（曾俊華或林鄭月娥），但（林鄭）都可以接受，一定好過梁振英，希望佢搞番好香港，喺經濟、民生、住屋嗰類方面。」
王女士坦言，認為林鄭在房屋方面有努力過，一地兩檢等爭議她則未有留意，惟到今次《逃犯條例》修訂，令她首次感到威脅，下一代未必可以安居樂業，「好多變數喺度囉。」
「阿女解釋俾我聽，原來呢條法例，唔係送返去（中國）咁簡單。佢俾啲圖片我睇，我明白到（修例的問題），所以我行出嚟。」王女士說，女兒給她看一些圖畫，內容講述在《逃犯條例》修訂後，有個少女在內地被強姦，她在反抗時插傷強姦犯的眼睛，少女回到香港後，反被移交到內地。
王女士續指，相信修例後，在香港的普通人都會面臨危險，「唔係你唔返（內地）就冇事。」她表示，兩個女兒都從事文職工作，偶爾回內地工幹，令她感到特別擔心，「欲加之罪，何患無辭？因為返大陸係好常嘅事，（修例後）好容易唔知咩事就俾人拉咗去嘅感覺。以前我感覺係，你唔去犯事，喺香港就係冇事，但有咗呢條法例就唔係嘅，我先知。叫做醒覺囉。 其實我咁嘅歲數，真係冇所謂。但係細嗰代，我真係會代佢哋驚。驚佢哋第時冇自由，好多嘢都唔係佢哋話事。」
之前三次反送中遊行，王女士都有工作在身，未能參與。到6月12日，她再次見到年輕人佔領馬路，雖然她仍有感示威者有點阻街，但想到送中事態嚴重，對示威者多一分諒解，「明白多咗。但都係希望佢哋和平，唔想佢哋有損傷，大家都心痛，好似有個老師隻眼（受傷），咁大家都好心痛。」警方出動橡膠子彈、布袋彈，更射向示威者的頭部，令王女士甚為生氣，「你射手腳唔緊要，你唔好兜口兜面射佢囉。亦唔應該話（示威者）『暴動』，佢哋有啲激烈動作，但始終都係後生、細個，應該原諒佢哋，唔應該咁樣（定性為暴動）。」
林鄭周六宣布暫緩修例，王女士沒有看記招，對特首的態度、回應沒有評價，「但我希望係撤回，唔係暫緩。」王女士說，為了下一代，6月16日走上街頭發聲，「而家唔講，驚以後冇機會。」
遊行隊伍中，有另一位為反送中而首次上街的媽媽。「我係一個不理政治嘅人，淨係需要搵份工、有嘢做，生活安居樂業。我個仔都話，如果我都要行出嚟，咁呢個香港真係好惡劣。」她是近60歲的盧女士，從事文職工作，平日坐辦公室歎冷氣，從來未試過頂著炎夏上街，直至6月9日，她成為103萬反送中遊行人潮一員。
盧女士坦言，她過往對時政大事一概不理，「我係等政府為我哋解決問題。」即使2003年23條鬧得沸沸揚揚，她不贊成立法，但也沒有做什麼，仍是一個「等」字，「我覺得政府係會為我哋去諗，（董建華）都（與市民）有商量。」
令盧女士開始留意時政的，是2014年的雨傘運動，「我從來都唔多睇新聞，但嗰時都多咗留意，都會睇吓點解會咁樣嘅呢，之後一直都會關心。」政府對待年輕人的態度、手段，是她的關注焦點，「我覺得係唔應該（放催淚彈），冇錯佢哋係霸住條馬路，但佢哋係和平咁表達意見，政府冇理佢哋，然後夾硬要趕佢哋走。如果政府肯放下身段同佢哋傾，理解佢嘅需求，會唔會要放幾十個催淚彈嘅局面呢？完全係冇商量，咁你叫市民做咩好呢？」
以為林鄭上場，政府對下一代的態度會好轉，「當初覺得佢有個慈母嘅心，佢都有兩個仔，會諗兩個仔嘅前途係點、香港市民啲仔女嘅前途係點，我估佢會諗，而家發覺完全係睇錯。今次佢（林鄭）真係做得太差，令我哋太絕望。」
盧女士坦言，《逃犯條例》修訂對她沒有貼身影響，惟認為修例對香港個影響深遠，「不論人定經濟，個影響都會好大。除咗外資會撤走，香港人都會撤走啦。」
為了反對修例，6月9日，盧女士一生人首次上街；6月16日，她再次上街。「上次遊行都帶住個希望，希望佢會變；但今次呢個遊行，係覺得佢唔會變。」
盧女士指，因為警方在6.12以過度武力清場，以及林鄭周六開記招的態度惡劣、無悔意，即使遊行未必有效果，她仍決定上街表態。「暫緩我唔接受，同埋6月12日對啲示威者太過粗暴，我睇唔過眼，真係睇唔過眼。我同林鄭一樣有兩個仔，一個30歲、一個25歲，但我唔係淨係為我兩個仔，我都要為全香港市民（上街），我都係香港人嚟㗎嘛，而家唔係淨係我一家人嘅事，而係全香港人嘅事。」她坦言，經過6.12，她覺得遊行也可能有危險，「但唔理得咁多，佢夠膽咪射埋嚟囉，吓嘛？你想我死咪射埋嚟囉，冇咩所謂，反正如果佢唔改變嘅，香港都遲早死。」
盧女士表示，2014年及2019年的兩次佔領，她都支持學生，惟覺得林鄭的處理手法，比梁振英更差，「企喺度都叫『暴動』，咁你想我哋點樣呢？今次（警方）更加嚴重啦，好唔合理。點解你要出到槍？係咪想香港人死？咁個個都有仔女，佢都有兩個仔啦，如果佢嗰兩個仔喺嗰堆人度，咁點呀？佢又識得收埋兩個仔，叫佢哋唔好返嚟（香港），至惡係佢啦，叻到盡啦。」
盧女士的細仔正在澳洲修讀醫護相關科目，被問到會否也建議兒子留在當地，她表示會讓孩子自行選擇，「唔會好似林鄭咁樣唔俾個仔任性囉。未來係年輕人嘅世界，咩係任性呢？係佢選擇。或者佢睇嘢闊過我，要俾年青人自由發展，你唔能夠話自己係阿媽就管住佢、唔俾佢任性。」
觀看原文： 按此連結
