【曾偉權病逝】亞視跳槽TVB 男一變配角 拯救流浪狗愛心洋溢

曾偉權1981年入讀亞視前身麗的嘅藝員訓練班而入行，同屆同學有何家勁。曾偉權話係因為有朋友建議有夾band演話劇經驗嘅佢，去電視台讀藝訓班，於是行上廣播道，見到麗的條人龍短啲就去排，報完名想去埋無線，但係臨近截止仲有百幾人排緊，於是無報到。

畢業2年曾偉權已經成為劇集男主角，拍過多套麗的／亞視重頭劇，包括《武則天》、《101拘捕令》及《雲海玉弓緣》等。雖然不在大台，但係曾偉權知名度唔錯，贏過報章舉辦嘅電視明星獎，又代表亞視去台灣出席金鐘獎。

到1990年曾偉權跳槽無線，起初幾年都獲安排做男主角，但係後來發展平平，1996年前往馬來西亞發展，1999年重返TVB。2012年轉投香港電視，喺《來生不做香港人》演劉美君老公，屬第二男主角。港視不獲發牌之後，曾偉權2015年重返TVB，憑《宮心計2深宮計》武攸暨一角獲提名最佳男配角，而正在播出嘅《使徒行者3》權哥亦有份參演。早前TVB回覆傳媒查詢時表示，曾偉權以減產為由轉做兼職合約，月前就因為休養而選擇唔續約。

幕前演出以外，曾偉權工餘時間會做義工拯救流浪貓狗，試過同宣萱喺TVB附近救狗，又會協助做絕育放回。