【曾志偉出手】TVB與三大唱片公司破冰 邊個係輸家

·4 分鐘文章
【曾志偉出手】TVB與三大唱片公司破冰 邊個係輸家
【曾志偉出手】TVB與三大唱片公司破冰 邊個係輸家

一月初獲TVB主席許濤力邀加盟出任高層的曾志偉,埋位未夠2個月已經多多動作。據知負責綜藝及音樂嘅志偉,搵曾經効力TVB多年嘅「橋王」何麗全,幫手搞掂因版稅問題而同TVB關係麻麻嘅唱片公司環球、華納及Sony Music,後日(24日)更會有大型記者會,宣布同「三大」破冰,意味多年來未能出現TVB節目嘅「三大」旗下歌手,將有機會重新現身!「三大」同TVB不和多年,估計成個娛樂圈會因為今次破冰出現微妙變化,TVB同「三大」當然有著數,咁邊個會係輸家?

VIU TV

【曾志偉出手】TVB與三大唱片公司破冰 邊個係輸家
【曾志偉出手】TVB與三大唱片公司破冰 邊個係輸家

因為「三大」同TVB關係欠佳,2016年開台嘅VIU TV,選秀節目《全民造星》越做越有,近年食住個勢銳意做好音樂節目Chill Club,邀請三大以及其他唱片公司的歌手獻唱。早前更公布喺4月舉行首屆《CHILL CLUB推介榜年度推介》頒獎禮,被視為正面挑戰TVB。但係三大同TVB即將破冰,到時唱片公司點安排派歌手出席VIU TV嘅頒獎禮,以免得失曾志偉?

另一方面,TVB向來鍾意同日同時段搞節目對撼隔離台節目,好似上年12月就用《衝上雲霄大選》對撼《全民造星3》決賽。假如TVB喺VIU TV音樂頒獎禮同日搞大型音樂騷,仲mark實一線歌手,咁VIU TV可以點應對?呢鋪就考起VIU TV高層金廣誠嘞。

星夢幫

【曾志偉出手】TVB與三大唱片公司破冰 邊個係輸家
【曾志偉出手】TVB與三大唱片公司破冰 邊個係輸家

近年TVB劇集歌曲幾乎由旗下星夢娛樂歌手包辦,連頒獎禮都被取笑係「星夢annual dinner」,只要係星夢歌手一定有獎攞。一旦TVB同三大唱片公司關係回復正常,「星夢幫」唔再係節目同劇集歌唯一選擇,難以好似以前咁靠劇集歌洗腦而入屋。最受影響嘅可能係谷婭溦、伍富橋同謝東閔呢類仍待努力嘅歌手,有機會變返做藝員冇得出歌。至於近年加盟嘅周柏豪、連詩雅同JW(王灝兒),本身有知名度同經驗,雙線發展都冇問題。而三奪「最受歡迎女歌星」嘅「星夢一姐」菊梓喬,畢竟人氣、銷量都唔錯,留低都有價值,但係幾肯定唔會第四次拎「最受歡迎女歌星」。

至於星夢嘅角色,好可能成為八九十年代TVB旗下嘅華星唱片咁,將電視台藝員以至歌唱比賽中有潛質嘅參加者收歸旗下,但為咗平衡各方勢力,唔一定好似過去幾年咁壟斷喺TVB嘅曝光率。

三大以外其他唱片公司

【曾志偉出手】TVB與三大唱片公司破冰 邊個係輸家
【曾志偉出手】TVB與三大唱片公司破冰 邊個係輸家

因為搵唔到「三大」歌手參與音樂節目,TVB都會搵英皇、寰亞、多間小型唱片公司同埋獨立運作嘅歌手出鏡。「三大」歸隊之後,其他公司嘅歌手再唔係必然之選,曝光率難免受影響。向來同TVB關係良好嘅英皇,過去十年都因為「三大」糾紛而受惠,包括締造容祖兒十奪「最受歡迎女歌星」,以及令古巨基、張敬軒、林峯、李克勤4位英皇男歌手十年間囊括「最受歡迎男歌星」獎。以後英皇歌手喺「勁歌」頌獎禮面對嘅競爭會更激烈,不過頭先提過嘅幾位都已經專注內地發展,泳兒、吳浩康呢班第二梯隊要俾心機啦。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!